1該日，有人大聲讀摩西个法律書給眾人聽；佢等讀到一段講：絕對不准亞捫人㧯摩押人加入屬上帝个會眾。
2這係因為以色列人在出埃及个路項，亞捫人㧯摩押人毋單淨無用食物㧯水來迎接以色列人，反轉請巴蘭來咒詛佢等；總係𠊎等个上帝使該咒詛變做祝福。
3以色列人民聽到這段法律，就將所有个外族人對佢等當中分開。
4管理聖殿倉庫个祭司以利亞實盡久以來㧯多比雅有當好个交情。
5佢准多比雅用一間大房間；該房間本來係放獻素祭用个五榖㧯香料、聖殿中个東西、給祭司个祭物、並給利未人、聖殿詩班、聖殿守衛个十分之一捐(就係對五榖、酒、橄欖油收成个十分之一)。
6發生這事个時，𠊎無在耶路撒冷；因為亞達薛西做巴比倫王个第三十二年，𠊎轉去向佢報告。過無幾久，𠊎得到王个許可，
7倒轉去耶路撒冷。𠊎正發現這件壞事，就係以利亞實准多比雅用上帝聖殿肚个一間大房間。
8𠊎當譴，將多比雅个東西全部㧹出去。
9𠊎下令拚淨這房間，將上帝聖殿个器皿、素祭㧯香料放轉去。
10𠊎又聽講聖殿詩班㧯其他个利未人已經離開耶路撒冷，轉去佢等个田莊，因為人民無供給佢等罅額个食物維持生活。
11𠊎責備該兜官長，樣做得由在聖殿荒掉。𠊎將利未人㧯詩班喊轉來聖殿復職。
12恁樣所有猶大人民就再將五榖、酒、橄欖油个十分之一帶到聖殿个倉庫。
13𠊎派兜人掌倉庫；佢等係：祭司示利米雅、經學專家撒督、利未人比大雅。佢等个助手係瑪他尼个孫仔、撒刻个孻仔哈難。𠊎信任這兜人；佢等係負責分東西給佢等个同工。
14𠊎个上帝啊，求你因為這件事來紀念𠊎，記得𠊎為你个聖殿㧯敬拜个禮儀所做个好事。
15該站時間，𠊎在猶大看到有人在安息日做酒，也有人將五榖、酒、葡萄、無花果，㧯其他東西捆在驢仔背頂，運到耶路撒冷去。𠊎警告佢等做毋得在安息日做生理。
16有兜泰爾城來个人住在耶路撒冷；佢等將魚仔㧯逐種貨物帶入城肚，在安息日賣給𠊎等个人民。
17𠊎責備猶太人个貴族講：「你等樣敢做這壞事，犯到安息日呢？
18這敢毋係上帝刑罰你等祖先、毀滅這城个原因？你等這下又犯到安息日，會害以色列人更加惹上帝大發譴。」
19所以，𠊎下令，在逐個安息日前，臨暗仔一到，耶路撒冷个城門就愛關起來，直到安息日過掉正做得打開。𠊎派幾個僕人守在城門口，毋准人在安息日帶貨物入來。
20有一兩擺，該兜賣貨物个生理人在耶路撒冷城外過夜。
21𠊎就警告佢等講：「你等做麼介在城外過夜呢？若係你等再恁樣，𠊎愛對付你等。」對該時起，佢等在安息日就無再過來了。
22𠊎吩咐利未人愛潔淨自家，然後去看守城門，使人民確實守安息日做聖日。𠊎个上帝啊，求你為到這件事記得𠊎，又因為你个大慈愛憐憫𠊎。
23在該站時間，𠊎也發現盡多猶太人討亞實突、亞捫、摩押个婦女做𡜵娘。
24佢等个子女一半講亞實突話抑係別種語言，毋會講𠊎等自家猶大个話。
25𠊎就責備佢等，咒詛佢等，打佢等幾個人，挷佢等个頭那毛。𠊎喊佢等奉上帝个名發誓，不准佢等將自家个子女㧯外族人通婚。
26𠊎對佢等講：「敢毋係外族婦女使以色列王所羅門犯罪嗎？雖然所羅門王比其他國家个君王偉大，上帝惜佢，使佢統治全以色列，佢還係被外族婦女引誘犯這種罪。
27敢講𠊎等愛學你等个壞樣，去㧯外族婦女結婚來違背上帝係麼？」
28耶何耶大係大祭司以利亞實个孻仔。總係佢有一個孻仔討和倫人參巴拉个妹仔，所以𠊎喊佢離開耶路撒冷。
29𠊎个上帝啊，求你記得這兜人樣般打垃圾祭司个職務，違背你㧯祭司、利未人所立个約。
30恁樣𠊎就潔淨人民，使佢等離開所有外族个東西。𠊎為祭司㧯利未人制定職務，使逐儕人全部知自家个工作。
31𠊎也安排好，愛人民照時將獻祭用个柴、新出个五榖、水果帶來。𠊎个上帝啊，求你紀念𠊎，施恩給𠊎。