1下背係祭司㧯利未人个名單；佢等全部係㧯撒拉鐵个孻仔所羅巴伯並大祭司耶書亞共下對流亡轉來个人。
2祭司有：西萊雅、耶利米、以斯拉、亞瑪利雅、瑪鹿、哈突、
3示迦尼、利宏、米利末、
4易多、近頓、亞比雅、
5米雅民、瑪底雅、璧迦、
6示瑪雅、約雅立、耶大雅、
7撒路、亞木、希勒家㧯耶大雅。這兜人在耶書亞時代係祭司當中个領袖。
8利未人有：負責主唱感謝詩歌个耶書亞、賓內、甲篾、示利比、猶大、瑪他尼；
9在詩班肚負責對唱个有八布迦、烏尼，㧯佢等个同事利未人。
10耶書亞係約雅金个阿爸；約雅金係以利亞實个阿爸；以利亞實係耶何耶大个阿爸；
11耶何耶大係約拿單个阿爸；約拿單係押杜亞个阿爸。
12約雅金做大祭司个時，下背个祭司係祭司宗族个族長：西萊雅族个米拉雅、耶利米族个哈拿尼雅、
13以斯拉族个米書蘭、亞瑪利雅族个約哈難、
14米利古族个約拿單、示巴尼族个約瑟、
15哈琳族个押拿、米拉約族个希勒愷、
16易多族个撒迦利亞、近頓族个米書蘭、
17亞比雅族个細基利、米拿民族个某人、摩亞底族个比勒太、
18璧迦族个沙母亞、示瑪雅族个約拿單、
19約雅立族个瑪特乃、耶大雅族个烏西、
20撒來族个加萊、亞木族个希伯、
21希勒家族个哈沙比雅、耶大雅族个拿坦業。
22在以利亞實、耶何耶大、約哈難、押杜亞做大祭司个時，利未家族㧯祭司家族个族長有記錄下來。這記錄係在大流士做波斯皇帝時完成个。
23總係，記在官方記錄上个利未家族族長只有到以利亞實个孫仔約哈難个時代。
24利未人个族長係哈沙比雅、示利比、約書亞、賓內、甲篾，㧯佢等共下事奉个兄弟，一班對一班，照神人—大衛王个指示，一唱一和讚美、感謝上帝。
25負責看守聖殿門堘頭倉庫个守衛：瑪他尼、八布迦、俄巴底亞、米書蘭、達們、亞谷。
26這兜人係約撒達个孫仔、耶書亞个孻仔約雅金時代个人，也係省長尼希米㧯經學專家祭司以斯拉時代个人。
27當耶路撒冷城牆舉行奉獻禮个時，利未人對佢等住个所在被人請轉去耶路撒冷參加奉獻典禮。佢等用感謝个詩歌、鑇仔、豎琴㧯七弦琴歡歡喜喜來慶祝。
28唱歌个利未家族對耶路撒冷周圍个地區、尼陀法附近个村莊，
29並對伯‧吉甲、迦巴、押瑪弗恁多地方聚集，因為唱歌个人在耶路撒冷四周圍為自家建立村莊。
30祭司㧯利未人為自家㧯民眾、城門、城牆主持潔淨个儀式。
31𠊎召集猶大个領袖上城牆頂，喊佢等帶領兩大隊民眾遊行𫟧城，感謝上帝。一隊向右，在城牆頂垃圾門前進。
32在佢等个後背有何沙雅㧯猶大領袖个一半。
33又有亞撒利雅、以斯拉、米書蘭、
34猶大、便雅憫、示瑪雅㧯耶利米。
35還有該兜歕喇叭祭司个子孫，並撒迦利亞；佢係約拿單个孻仔，示瑪雅个孫仔。佢个祖先包含亞薩宗族个瑪他尼、米該亞㧯撒刻。
36撒迦利亞个後背跈等共下事奉个兄弟：有示瑪雅、亞撒利、米拉萊、基拉萊、瑪艾、拿坦業、猶大㧯哈拿尼。佢等全部拿等神人—大衛王所彈該種樂器。經學專家以斯拉𢱋這隊前進。
37在泉水門該位，佢等對大衛城个石段仔一直行上去，經過大衛王宮个牆頂，然後轉到城東片个水門該位。
38第二隊感謝个人向左行，順等城牆頂前進，𠊎㧯另外一半个民眾跈佢等。𠊎等經過爐樓，來到闊牆，
39又行過以法蓮門、耶沙拿門、魚門、哈楠業樓、百樓，直到羊門。𠊎等行到守衛門就結束遊行。
40恁樣，感謝上帝个兩隊人來到聖殿該位。除了㧯𠊎共下个領袖以外，
41𠊎這隊還包含以下歕等喇叭个祭司：以利亞金、瑪西雅、米拿民、米該雅、以利約乃、撒迦利亞、哈楠尼亞。
42佢等後背有瑪西雅、示瑪雅、以利亞撒、烏西、約哈難、瑪基雅、以攔、以謝。伊斯拉希雅帶領詩班大聲唱歌。
43該日，𠊎等舉行盛大个獻祭；民眾全部非常歡喜，因為上帝使佢等大大快樂。婦女㧯細人仔也參加慶祝。耶路撒冷歡喜快樂个聲盡遠就聽得到。
44該時，有兜人受派掌倉庫，就係放逐年新出个五榖、水果㧯十分之一奉獻个所在。這兜人愛負責對逐城附近个田莊，收集法律規定給祭司㧯利未人个奉獻禮物。猶大所有个人民全部當滿意祭司㧯利未人个事奉，
45因為佢等有守服事上帝个禮儀㧯潔淨个禮儀。聖殿詩班㧯聖殿守衛也照大衛王㧯厥孻仔所羅門个規定執行任務。
46對大衛王㧯音樂家亞薩个時代以來，詩班一直係領導唱歌頌讚、感謝上帝个人。
47所羅巴伯時代㧯尼希米時代，以色列人逐日將奉獻禮物送給聖殿詩班㧯守衛。又給利未人應當得个奉獻禮物；利未人再給亞倫該兜祭司應當得个一份。