Mark 7
1 法利賽人㧯幾個對耶路撒冷來个經學教師共下來見耶穌。
2 佢等看到耶穌个學生中有人用無淨浰个手食飯，無像法利賽人恁樣先洗手。
3 (原來法利賽人㧯一般个猶太人全部遵守祖先个傳統，若係無照規定个方法先洗手就毋食飯；
4 對街路買來个東西，若無先洗過也毋食。佢等還遵守盡多其他傳統个規定，像愛樣般洗杯仔、鑊仔、銅器㧯眠床等等。)
5 所以法利賽人㧯經學教師問耶穌講：「樣般你个學生無遵守𠊎等祖先个傳統，反轉用無淨浰个手食飯呢？」
6 耶穌講：「以賽亞指你等這種假冒為善个人所講个預言實在無毋著！像聖經所記：上帝恁樣講：『這兜人用嘴唇皮尊敬𠊎，總係佢等个心遠遠離開𠊎。
7 佢等將人个規定準做𠊎个命令來教人；佢等敬拜𠊎也係空空。』」
8 耶穌講：「你等遵守古早人个傳統，總係違反上帝个命令。」
9 佢又講：「你等用盡高明个藉口來拒絕上帝个命令，目的就係愛保守自家个傳統。
10 摩西講：『愛孝敬爺𡟓』；又講：『咒罵爺𡟓个，愛判佢死刑。』
11 你等偏偏講，無論麼人對爺𡟓講：『𠊎將奉養你等个東西準做可板』(意思係獻給上帝个東西)，
12 佢就毋使奉養爺𡟓。
13 你等恁樣做，就係拿你等教人个傳統來廢掉上帝个話。你等還做盡多像這種个事。」
14 耶穌又召集眾人到佢面前，對佢等講：「你等大家愛聽𠊎个話，也愛明白。
15 對外背入到人底背个，毋會使人無淨浰；反轉，對底背出來个正會使人無淨浰。」
17 耶穌離開眾人入去屋肚个時，厥學生問佢這比喻个意思。
18 耶穌㧯佢等講：「你等同佢等共樣無明白嗎？敢講你等毋知？對外背入去个毋會使人無淨浰；
19 因為對外背入去个毋係到佢个心中，係到佢个腸肚底背，然後就屙出來。」(耶穌講這個話，意思係講一切食物全部係淨浰个。)
20 佢繼續講：「使人無淨浰个係對人底背出來个。
21 因為對人心中出來个，有種種个惡念；這兜惡念會使佢犯通姦、偷拿、兇殺、姦淫、
22 貪心、邪惡、詭詐、放蕩、嫉妒、譭謗、驕傲、癲狂等罪惡。
23 這一切个邪惡全部係對人底背出來，也正經會使人無淨浰个。」
24 耶穌離開該所在，到泰爾城附近个地方去。佢住在一個人家，無愛俾人知，總係囥毋住。
25 有一個婦人家，姖个妹仔被邪靈附身。姖聽到耶穌个事，即時來見佢，跪在佢个腳前。
26 這婦人家係一個外國人，在敘利亞个腓尼基出世个。姖求耶穌將厥妹仔身上个鬼逐出去。
27 耶穌對姖講：「愛給子女先食飽；拿子女食个餅仔㧒給狗仔食係毋著个。」
28 該婦人家應講：「主啊，無毋著，總係桌底下个狗仔乜食子女所賸个餅碎仔啊！」
29 耶穌對姖講：「憑這句話，你好轉去了；鬼已經對若妹仔身上出去了！」
30 該婦人家就轉屋下，看到妹仔睡在眠床頂；鬼已經離開姖。
31 耶穌離開泰爾附近个地方，經過西頓，對十邑轉到加利利湖。
32 有人將一個又聾又啞个人帶到耶穌面前來，求耶穌為佢按手。
33 耶穌帶佢離開人群，到堘頭去，用自家个手指探佢个耳公，又用口潾膏佢个舌乸。
34 耶穌昂頭望天，深深透一口大氣，對該人講：「爾發大！」意思就係「打開來！」
35 該人个耳公就打開來，舌乸筋也襛下來，佢就開口講話，全無困難。
36 耶穌吩咐大家千萬毋好對人講起這項事；總係佢越吩咐，佢等就越宣傳。
37 所有聽到个人全部十分奇怪；佢等講：「佢逐樣事情全部做到恁好！佢甚至使耳聾个聽到，使啞仔講話！」