Bible

1 若係有人獻牛做平安祭，佢一定愛選無缺點个牛牯抑係牛牸，獻在上主面前。 2 佢愛將手放在頭牲个頭那頂，在聖帳篷門口將牠㓾掉。亞倫族个祭司愛將牲儀个血洒在祭壇四周圍。 3 該人愛對平安祭中準備獻給上主个火祭；佢愛將包等腹內㧯腹內面頂个油， 4 兩隻腰仔㧯腰仔面頂个油，並肝面頂个網油割下來。 5 亞倫个子孫愛將這兜放在祭壇个柴火頂，就係在燒化祭頂高共下燒。這火祭个香味係上主所歡喜个。 6 若係佢愛對羊群中選一隻羊獻給上主做平安祭，佢一定愛選無缺點个羊牯抑係羊乸。 7 若係佢獻細綿羊給上主， 8 佢愛將手放在頭牲个頭那頂，在聖帳篷前將牠㓾死。亞倫个子孫愛將牲儀个血洒在祭壇四周圍。 9 該人愛對平安祭中準備獻給上主个火祭；佢愛將油、對偎龍骨个地方割下來个歸條肥个羊尾、包等腹內㧯在腹內面頂个油、 10 兩隻腰仔㧯腰仔面頂个油，並肝面頂个網油割下來。 11 祭司愛將這兜全部放在祭壇頂來燒，就像食物一樣，做火祭獻給上主。 12 若係佢獻山羊給上主， 13 佢愛將手放在頭牲个頭那頂，在聖帳篷前將牠㓾死。亞倫个子孫愛將牲儀个血洒在祭壇四周圍。 14 該人愛對這牲儀準備獻給上主个火祭；佢愛將包等腹內㧯腹內面頂个油、 15 兩隻腰仔㧯腰仔面頂个油，並肝面頂个網油割下來。 16 祭司愛將這兜全部放在祭壇頂來燒，就像食物一樣，做清香个火祭。所有个油係屬上主个。 17 你等無論住在㖠位，絕對做毋得食油㧯血。這係你等世世代代永遠愛遵守个命令。