Bible

1 若係有人獻素祭給上主，佢愛用幼麵粉。佢愛倒兜橄欖油在麵粉底背，將乳香放在頂高， 2 帶到亞倫族个祭司面前。祭司愛扡一揢幼麵粉㧯橄欖油，並所有个乳香放在祭壇頂來燒，代表獻全部。這火祭个香味係上主所歡喜个。 3 賸到个素祭愛歸給亞倫㧯佢个子孫；這係至聖个，因為係對獻給上主个火祭中留下來个。 4 若係你獻个係用爐仔焙个素祭，愛獻用幼麵粉攪橄欖油做成个無酵賁餅，抑係膏橄欖油个無酵薄餅。 5 若係你獻个係用煎盤煎个素祭，愛獻用幼麵粉攪橄欖油做个無酵餅。 6 獻餅个時，愛將它擘做一垤一垤，頂高淋兜油。這係素祭。 7 若係你獻个係淺鑊頭煏个素祭，愛用幼麵粉攪橄欖油做个。 8 你愛將這兜東西做个素祭帶到上主面前，交給祭司帶到祭壇頭前。 9 祭司愛拿素祭个一部份放在壇頂來燒，代表獻全部。這火祭个香味係上主所歡喜个。 10 賸到个素祭愛歸給亞倫㧯佢个子孫；這係至聖个，因為係對獻給上主个火祭中留下來个。 11 你等獻給上主个素祭全部做毋得攪酵乸；你等絕對做毋得將酵抑係蜂糖做火祭獻給上主。 12 你等做得將這兜獻給上主做每年新出个祭物，總係做毋得放在祭壇頂燒做清香个祭物。 13 你所獻个各種素祭全部愛攪鹽，因為鹽代表上帝㧯你等所立个約。你一定愛用鹽攪各種祭物。 14 若係你獻新出个五榖給上主做素祭，愛獻焙過个五榖軋做粗粉。 15 還愛加兜橄欖油，將乳香放在頂高；這係素祭。 16 祭司愛拿一部份个五榖粗粉、油㧯所有个乳香，代表獻全部，做火祭獻給上主。