Leviticus 14
1 上主將有關癩淨浰後个條例宣佈給摩西。
2 病人愛算做淨浰該日，人愛帶佢去看祭司。
3 祭司愛到營外去檢查佢，若係發現佢个癩病好了，
4 祭司愛喊人為該求淨浰个帶兩隻禮儀上認定淨浰个鳥仔、一垤香柏樹、一條深紅色个線，㧯一支牛膝草个嫩枝來。
5 祭司愛吩咐人在裝滿泉水个泥盆頂㓾其中个一隻鳥仔，
6 同時祭司愛捉住另外一隻鳥仔，將牠連同香柏樹、深紅色个線，㧯牛膝草共下搵盆肚个血，
7 在該求淨浰个病人身上拂血七擺，然後宣佈佢係淨浰个。祭司還愛放該隻生鳥仔走，俾牠飛向野外。
8 求淨浰个人愛洗淨衫褲，剃掉所有个頭那毛，洗身，恁樣佢在禮儀上就淨浰了。然後佢做得入到營肚，總係一定愛在佢个帳篷外先住七日。
9 第七日，佢愛再剃頭，剃鬚，剃掉目眉毛㧯身上所有个毛，還愛洗淨衫褲，洗身，然後在禮儀上正算淨浰。
10 第八日，佢愛帶兩隻無缺點个細羊牯、一隻一歲大、無缺點个羊牸仔、三公斤攪橄欖油个幼麵粉，㧯三分之一公升个橄欖油來。
11 行潔淨禮个祭司愛帶該求淨浰个人㧯這兜祭物到聖帳篷門口、上主个面前，
12 然後祭司愛獻一隻細羊牯㧯三分之一公升个橄欖油做贖過失祭；佢也愛將這兜搖幾下做搖祭獻給上主。
13 佢愛在㓾贖罪祭㧯燒化祭頭牲該聖个所在㓾這隻細羊。佢一定愛恁樣做，因為贖過失祭㧯贖罪祭共樣係歸給祭司，係至聖个。
14 祭司愛拿兜贖過失祭牲儀个血，膏在該求淨浰个人个右耳鉈、右手个手指公，㧯右腳个腳指公頂。
15 祭司愛倒一些仔橄欖油在左手心，
16 用右手个手指搵該油，在上主面前拂七擺。
17 祭司也愛拿一些仔左手心个油膏在該求淨浰个人个右耳鉈、右手个手指公，㧯右腳个腳指公頂，就係膏在贖過失祭牲儀个血頂。
18 佢也愛將手心賸到个油倒在該人頭那頂。祭司愛用這種方法在上主面前為該人行潔淨禮。
19 接等，祭司愛獻贖罪祭，為該本來無淨浰个人行潔淨禮，然後㓾燒化祭个頭牲，
20 將牠㧯素祭獻在祭壇頂。祭司愛用這方法為該人行潔淨禮，佢就淨浰了。
21 若係該人當苦，買毋起恁多牲儀，佢做得用一隻細羊牯來做贖過失祭，來搖幾下行潔淨禮。佢也愛帶一公斤攪橄欖油个幼麵粉做素祭，加三分之一公升个橄欖油。
22 佢還愛帶佢有力量買个兩隻月鴿仔抑係兩隻班鳩來，一隻做贖罪祭，一隻做燒化祭。
23 第八日，就係佢愛被人宣佈做淨浰該日，佢愛將這兜祭物帶到上主聖帳篷門口，交給祭司。
24 祭司愛將贖過失祭个細羊牯㧯橄欖油，搖幾下做搖祭獻給上主。
25 佢愛㓾該隻細羊，拿一些仔血，膏在該求淨浰个人个右耳鉈、右手个手指公，㧯右腳个腳指公頂。
26 祭司愛倒一些仔橄欖油在左手心，
27 用右手个手指搵該油，在上主面前拂七擺。
28 祭司也愛拿一些仔左手心个油膏在該求淨浰个人个右耳鉈、右手个手指公，㧯右腳个腳指公頂，就係用贖過失祭牲儀个血膏過个地方。
29 佢也愛將手心賸到个油倒在該人頭那頂。祭司愛用這種方法在上主面前為該人行潔淨禮。
30 接等，該人愛照佢有力量買个獻一隻月鴿仔抑係班鳩
31 做贖罪祭，另外一隻做燒化祭，㧯素祭共下獻。祭司愛用這種方法在上主面前為該人行潔淨禮。
32 這係發癩病、總係買毋起潔淨禮所愛獻个牲儀个人應該遵行个條例。
33 上主向摩西㧯亞倫宣佈有關屋仔生菇个條例。
34 (以色列人進入上主賜給佢等做產業个迦南地以後，若係佢使佢等个屋仔生菇，佢等愛照這兜條例為到屋仔行潔淨禮。)
35 無論麼人發現自家个屋仔生菇，一定愛去向祭司報告。
36 祭司愛吩咐人將屋仔底背所有个東西全部搬出來，免得屋仔底背个東西全部被人宣佈做無淨浰。東西搬出來後，祭司愛入去屋肚，
37 檢查生菇个地方。若係佢發現有青色斑點抑係紅色斑點生到壁頂，
38 佢就愛出來，在門口將屋仔封七日。
39 第七日，祭司愛再倒轉去檢查，若係發現壁頂个生菇已經遰到較大𣽛，
40 就愛吩咐人將有生菇个石頭挖出來，㧹在城外無淨浰个地方。
41 然後，佢愛吩咐人將屋肚壁頂个泥灰刮掉，將它倒在城外無淨浰个地方。
42 該挖出石頭个地方愛另外用石頭補上去，壁愛用泥灰重新粉過。
43 在挖出石頭、刮掉泥灰、重新粉過以後，若係屋仔再生菇，
44 祭司愛去檢查，生菇若遰到較大𣽛，這生菇盡嚴重，這屋仔就無淨浰了。
45 屋仔愛拆掉，將石頭、樹料、泥灰全部搬到城外無淨浰个地方㧒掉。
46 屋仔封鎖个期間，無論麼人入去，麼人就無淨浰到該日臨暗仔。
47 無論麼人在該屋肚睡抑係食，全部愛洗淨衫褲。
48 屋仔重新粉過以後，祭司倒轉來檢查，若係壁無再生菇，佢愛宣佈這屋仔係淨浰个，因為生菇已經完全無掉去了。
49 佢愛帶來兩隻鳥仔、一垤香柏樹、一條深紅色个線，㧯一支牛膝草个嫩枝，為屋仔行潔淨禮。
50 佢愛在裝滿泉水个泥盆頂㓾掉其中个一隻鳥仔，
51 然後拿香柏樹、牛膝草、深紅色个線，㧯另外一隻生鳥仔，將這兜搵盆肚个血，拂屋仔七擺。
52 佢愛用鳥仔血、泉水、生鳥仔、香柏樹、牛膝草，㧯深紅色个線為到屋仔行潔淨禮。
53 然後，佢愛將該隻生鳥仔放掉，由在牠飛去野外。佢愛用這種方法為到屋仔行潔淨禮，屋仔就淨浰了。
54 以上係有關癩，
57 這兜條例愛做決定淨浰㧯無淨浰个根據。