1上帝發譴个時𠊎被佢責備，𠊎係經驗這苦難个人。
2佢將𠊎逐到烏暗中，毋俾𠊎留在光明中。
3佢斷真一擺又一擺打擊𠊎，歸日無停。
4佢使𠊎个皮肉老衰；佢拗斷𠊎个骨頭。
5佢在𠊎个四圍起高牆，用艱難痛苦來包圍𠊎。
6佢迫𠊎住在烏暗中，像死盡久个人一樣。
7佢用當重个鐵鍊捆等𠊎；𠊎成做犯人，無法度逃走。
8𠊎大聲盡喊救命，總係上帝毋聽𠊎个祈禱。
9佢用大石擋𠊎个路，使𠊎个路彎彎斡斡。
10佢像熊仔恁樣䀯等𠊎，也像獅仔囥在暗中等等𠊎。
11佢逐𠊎離開大路，將𠊎擘到爛爛㧒掉。
12佢拉開弓搭上箭，拿𠊎準箭靶來射。
13佢拿箭袋个箭，射入𠊎个內臟。
14該兜人歸日嘲謔𠊎；𠊎成做大家个笑科。
15佢迫𠊎食苦菜，強灌𠊎啉苦酒。
16佢將𠊎个面撳在地泥下；佢用石頭敲斷𠊎个牙齒。
17𠊎个生活無平安；𠊎毋記得福氣係麼介。
18𠊎在世間个日仔無多了；𠊎對上主个盼望也無了。
19想到𠊎个痛苦㧯流浪，就像苦膽㧯毒藥共樣。
20𠊎一直想這兜事情，𠊎个心靈艱苦憂傷！
21總係𠊎想到另外一件事，𠊎就重新有希望：
22上主个慈愛永遠毋會斷掉；佢个憐憫也永遠毋會停掉；
23逐朝晨這兜全部係新个，你个信實極大無比！
24𠊎想：上主係𠊎个一切；所以，𠊎一定愛仰望佢。
25尋求佢，信靠佢个人，上主愛施恩給佢等。
26所以𠊎等應當仰望佢，耐心等候上主个救恩。
27𠊎等應該在後生个時學習揹重擔。
28主賜𠊎等苦難个時，自家應該恬恬坐等。
29𠊎等應該低頭順服，無定著還有希望。
30由在人打嘴角，定著愛忍到底。
31因為主滿有慈愛，佢毋會永遠㧒掉𠊎等。
32佢雖然使𠊎等憂愁，總係對𠊎等个痛惜毋會改變。
33佢毋係存心愛𠊎等受苦，也無愛使𠊎等憂愁。
34在監獄肚被人踏到腳底下，主定著會關心！
35剝削至高上帝賜个人權，主定著會關心！
36在法庭被人冤枉，主定著會關心！
37若毋係主下命令，無人能成就麼介。
38係禍患抑係福氣，全部愛看至高者个命令。
39還生个人因為犯罪受責罰，還有麼介好怪怨呢？
40𠊎等應該反省自家个行為，回頭歸向上主。
41𠊎等應該打開心門，擎手向天頂个上帝講：
42𠊎等犯罪悖逆你，你正無赦免𠊎等。
43你大發譴將𠊎等逐走；你剿滅𠊎等全無留情。
44你用烏雲遮等自家，使𠊎等个祈禱無辦法達到你面前。
45你使𠊎等在萬民中成做垃圾，被人㧒掉。
46𠊎等个仇敵嘲謔𠊎等，全部開嘴㩢耍𠊎等。
47𠊎等堵到著驚㧯陷害，受到災難㧯滅亡。
48為到同胞受到个滅亡，𠊎个目汁像河壩水流無停。
49𠊎个目汁緊流，停毋下來，
50緊等上主个看顧，望佢對天頂鑒察。
51𠊎看到城中个婦女受到災難，𠊎个心就悲傷痛苦。
52敵人無緣無故捉𠊎，像捉鳥仔一樣。
53佢等將𠊎生生㧒落囤水窟，頂高還用大石頭揜等。
54水浸到𠊎个頭那；𠊎想：𠊎會無命了！
55上主啊，在深深个窟肚，𠊎求喊你个名。
56求你聽𠊎求救个聲，求你毋好塞等耳公。
57𠊎求你个時，你親近𠊎，應𠊎講：「毋使驚！」
58主啊，你代𠊎伸冤；你救贖𠊎个性命。
59上主啊，你看到𠊎受个冤枉；求你判𠊎無罪！
60你看到仇敵樣般恨𠊎，樣般謀害𠊎。
61上主啊，你聽到佢等亂罵𠊎；你知佢等愛謀害𠊎。
62對敵歸日參詳愛攻擊𠊎，設計愛陷害𠊎。
63你看，佢等無論坐等抑係企等，一直編歌仔來嘲謔𠊎。
64上主啊，求你責罰佢等，照佢等所做个報應佢等。
65求你咒詛佢等，使佢等絕望。
66求你發譴逐走佢等，使佢等對普天下消滅！