1耶穌恁樣祈禱以後，就同學生共下出去，過汲淪溪。該地方有一個橄欖園，耶穌㧯學生攏總入去。
2出賣耶穌个猶大也知該所在，因為耶穌常常㧯厥學生聚集在該位。
3猶大帶一隊羅馬个兵仔，湊等祭司長㧯法利賽人所派聖殿个衛兵，共下入園去。佢等帶等武器，也拿等燈籠㧯火把。
4耶穌知會發生在厥身上个一切事情，就進前問佢等講：「你等尋麼人？」
5佢等應講：「拿撒勒人耶穌。」耶穌講：「𠊎就係。」該時，出賣耶穌个猶大也同佢等企共下。
6耶穌一講「𠊎就係」，佢等就打亂退，橫在地上。
7耶穌又問講：「你等尋麼人？」佢等應講：「拿撒勒人耶穌。」
8耶穌講：「𠊎㧯你等講過，𠊎就係。假使你等係尋𠊎，就俾這兜人走。」
9耶穌恁樣講，係愛應驗佢以前講過个話：「阿爸啊，你所交給𠊎个人，𠊎連一個也無失落。」
10西門‧彼得帶等一支刀仔；佢將刀仔挷出來，對大祭司个僕人馬勒古劈過去，將佢右片个耳公削下來。
11耶穌對彼得講：「將刀仔收起來！吾爸交給𠊎个苦杯，你恅到𠊎毋願意啉嗎？」
12該隊羅馬兵㧯隊長，連猶太人聖殿个衛兵就將耶穌捉起來，䌈等，
13先將佢解送到亞那个面前去；亞那係該年个大祭司該亞法个丈人老。
14這該亞法識對猶太人个領袖建議講，一個人代全國个人死係最有利益个事。
15西門‧彼得㧯另外一個學生跈等耶穌；該學生㧯大祭司相識，佢就跈等耶穌入去大祭司个庭院肚。
16彼得留在門外。該㧯大祭司相識个學生又出來，㧯掌門个使女講，就帶彼得入去。
17該掌門个使女對彼得講：「你也係該人个學生，敢毋係？」彼得講：「𠊎毋係！」
18該時天氣盡寒，該兜僕人㧯衛兵用火炭起火，大家企等焙火；彼得也行前，同佢等共下企等焙火。
19大祭司盤問耶穌關係厥學生㧯佢个教訓。
20耶穌應講：「𠊎㧯人講話從來都係公開个。𠊎常常在會堂㧯聖殿，就係猶太人聚會个所在教訓人，毋識在暗中講麼介。
21你做麼介盤問𠊎呢？去問該兜聽過𠊎講話个人，佢等知𠊎識講麼介。」
22耶穌講了這個話，塍頭一個衛兵就搧佢个嘴角，講：「你恁樣應大祭司嗎！」
23耶穌講：「𠊎若係講毋著，你指證，毋著在㖠位！若係無毋著，你打𠊎做麼介？」
24這時，耶穌還被佢等䌈等；亞那就將佢解送到大祭司該亞法該位去。
25這時，西門‧彼得還企等焙火。有人對佢講：「你也係該人个學生，敢毋係？」彼得否認講：「𠊎毋係！」
26大祭司个一個僕人，就係被彼得削掉耳公該儕个親戚，佢講：「𠊎看到你同該人共下在橄欖園底背，敢毋係？」
27彼得又否認。該時，雞仔就啼。
28佢等對該亞法該位將耶穌帶到總督府。該時天曚光。猶太人个領袖毋入總督府去，因為佢等愛在節期中保持淨浰，正做得食𨃟過節个筵席。
29所以彼拉多出來見佢等，問講：「你等用麼介罪名告這人？」
30佢等應講：「佢若係無做壞事，𠊎等就毋會將佢交給你。」
31彼拉多對佢等講：「你等將佢帶轉去，照你等自家个法律審判佢就好了。」猶太人个領袖應講：「𠊎等無權好判人死刑。」
32(這應驗耶穌所講過、佢會樣般死个話。)
33彼拉多就入總督府去，喊耶穌來，問佢講：「你係猶太人个王麼？」
34耶穌應講：「這係你自家愛問个，抑係因為有人對你講過，你正恁樣問呢？」
35彼拉多講：「你恅到𠊎係猶太人嗎？係你本國个人㧯該兜祭司長將你交給𠊎。你到底做麼介事啊？」
36耶穌講：「𠊎个國毋係這世間个國；假使𠊎个國係這世間个國，𠊎个子民一定會為𠊎相㓾，𠊎就毋會落在該兜猶太人个手中。總係，𠊎个國毋係這世間个國！」
37彼拉多講：「恁樣講，你係王囉？」耶穌應講：「係你講𠊎係王。𠊎為到這個出世，也為到這個來到世間，係愛為真理做見證。凡係屬真理个人一定會聽𠊎个話。」
38彼拉多講：「真理係麼介？」彼拉多就出來，對猶太人講：「𠊎查毋出這人有麼介罪。
39總係你等有一個慣例，愛𠊎在𨃟過節為你等放一個囚犯。你等愛𠊎為你等放猶太人个王嗎？」
40佢等就大聲喊講：「毋愛佢！𠊎等愛巴拉巴！」(巴拉巴係一個強盜。)