John 17
1 耶穌講了這兜話，就昂頭望天，講：「阿爸啊，時節已經到了，求你榮光你个孻仔，俾孻仔也好榮光你。
2 你有將管理全人類个權柄賜給佢，使佢將永生賜給你所交託佢个人。
3 永生就係認識你—惟一个真神，又認識你所差來个耶穌基督。
4 𠊎已經在地上榮光你；𠊎已經完成你所交託个使命。
5 阿爸啊，這下求你在你自家个面前榮光𠊎，將該吂有世界以前，𠊎同你共有个榮光賜給𠊎！
6 「𠊎已經將你顯明給該兜你對世間擇出來交給𠊎个人。佢等本來係屬你个，你將佢等賜給𠊎；佢等也有遵守你个話。
7 這下佢等知，你所賜給𠊎个一切，全部係對你該位來个；
8 因為你所交給𠊎个道理，𠊎已經賜給佢等，佢等也有接受。佢等確實知𠊎係對你該位來个，也信係你差𠊎來。
9 「𠊎為到佢等求你。𠊎毋係為世間人求，反轉係為你所賜𠊎个人求，因為佢等係屬你个。
10 𠊎所有个全部係你个，你所有个也係𠊎个；𠊎个榮光係通過佢等顯明出來。
11 𠊎這下愛去你該位，無再留在世間，總係佢等愛留在世間。聖潔个阿爸啊！求你用你个名，就係你賜給𠊎个名，保守佢等，使佢等合做一體，像你㧯𠊎共樣。
12 𠊎同佢等共下个時，𠊎用你个名，就係你所賜給𠊎个名，保守佢等。𠊎也保護佢等；除了該註定愛滅亡个一儕以外，無一個失掉，恁樣來應驗聖經个話。
13 這下，𠊎愛去你該位；𠊎還在這世間个時講這兜話，係愛使佢等个心充滿𠊎个快樂。
14 𠊎將你个話賜給佢等；世間人就怨恨佢等，因為佢等毋係屬這世間，像𠊎毋係屬這世間一樣。
15 𠊎毋係求你將佢等對這世間帶走，𠊎係求你保守佢等脫離該邪惡者。
16 就像𠊎毋係屬這世間，佢等也毋係屬這世間。
17 求你用真理使佢等將自家奉獻給你；你个話就係真理。
18 像你差𠊎入世間，𠊎也派佢等入世間。
19 為到佢等，𠊎將自家奉獻給你，使佢等也會誠心奉獻給你。
20 「𠊎毋單淨為佢等求，也為該兜接受佢等个話來信𠊎个人求。
21 願佢等全部合做一體。阿爸啊，願佢等生在𠊎等底背，像你在𠊎底背，𠊎在你底背一樣。願佢等全部合做一體，使世間人信𠊎係你所差來个。
22 你賜給𠊎个榮光，𠊎也賜給佢等，使佢等合做一體，像𠊎等合做一體共樣。
23 𠊎在佢等底背，你在𠊎底背，使佢等完全合做一體，俾世間人知係你差𠊎來，也知你惜佢等，像你惜𠊎一樣。
24 「阿爸啊，你所賜給𠊎个人，𠊎在㖠位，𠊎愛佢等也同𠊎共下在該位，使佢等看到你賜𠊎个榮光；因為在創造世界以前，你就惜𠊎。
25 公義个阿爸啊，世間人毋識你，總係𠊎識你；這兜人也知係你差𠊎來。
26 𠊎已經將你顯明給佢等；𠊎還愛繼續恁樣做，為到使你對𠊎个痛惜充滿佢等个生命，𠊎也生在佢等个生命中。」