Job 9
1 約伯接等應講：
2 係啊，這道理𠊎全部知；總係在上帝面前，人樣會稱做義人呢？
3 麼人能㧯佢辯論呢？佢提出一千隻問題，一隻都無人會回答。
4 上帝大有智慧、大有能力；麼人抵抗佢還能平安呢？
5 佢徙大山，山也全無感覺；佢一發譴，連山都揙轉來。
6 佢使地挺動，離開原位；佢使地个柱仔搖動。
7 佢喊日頭莫出來，又使星仔無發光。
8 佢自家鋪設穹蒼，腳踏在海浪頂高。
9 佢在天頂安星仔—北斗、獵戶星、昴星、㧯南極个星群。
10 𠊎等無法了解佢所做个大事；佢奇妙个作為無窮無盡。
11 上帝對𠊎塍頭過，𠊎看毋到佢；佢對𠊎面前行過，𠊎也無感覺。
12 佢隨意拿走佢所愛个，無人能阻擋；麼人敢問佢講：你在該位做麼介呢？
13 上帝个怒氣毋會停止；該兜幫助海怪拉哈伯个人全部伏在佢个腳下。
14 𠊎樣敢應上帝？𠊎樣敢㧯佢拗？
15 𠊎雖然無罪，也毋敢應佢；𠊎只能向上帝—𠊎个審判者求憐憫。
16 就算𠊎求喊佢，佢正經答應𠊎，𠊎乜毋敢相信佢肯聽𠊎个聲。
17 佢用暴風打擊𠊎，無緣無故傷害𠊎。
18 佢毋俾𠊎透一口氣，反轉使痛苦充滿𠊎。
19 若係𠊎用暴力，麼人有佢恁大力！若係上法庭，麼人敢傳佢出庭？
20 𠊎雖然無罪，𠊎个話還係定𠊎有罪；𠊎雖然清白，佢還係愛證明𠊎个過失。
21 𠊎無罪，總係有麼介用呢？𠊎已經看輕𠊎个生命。
22 有罪無罪全部係共樣，總講上帝愛毀滅𠊎等。
23 若係忽然間堵到災禍來死掉，上帝就恥笑無罪个人所受到个絕望。
24 上帝將世界交在壞人个手中；佢使地上个審判官全部像青盲一樣。這毋係上帝做个，係麼人做个呢？
25 𠊎个日仔比送快信个走較遽，像飛等過去，無看到麼介福樂。
26 𠊎个生命像快艇走當遽，就像鷹鳥捉食物衝等下。
27 𠊎就算勉強歡笑，想毋記得自家个痛苦，
28 所有个災難還係害𠊎無葛無煞；因為𠊎知上帝毋會看𠊎做無罪。
29 既然佢愛判𠊎有罪，𠊎樣使白白伸冤呢？
30 就算𠊎用雪水洗身，就算𠊎拿茶籸洗手，
31 上帝還愛將𠊎㧒落垃圾窟；連𠊎个衫褲也全部會嫌𠊎。
32 若係上帝㧯𠊎共樣係人，𠊎做得㧯佢辯論；𠊎做得㧯佢共下去法院，兩儕當面來對質。
33 總係，佢㧯𠊎之間無公當个裁判；無人做得在上帝㧯𠊎之間做調解。
34 上帝啊，求你毋好再責罰𠊎！求你毋好再恐嚇𠊎。
35 恁樣，𠊎就敢大膽講話，全毋使驚你；總係，這下𠊎个情形並毋係恁樣。