Bible

1 接等，書亞人比勒達應講： 2 這種話你愛講到幾時呢？你講个像風差恁樣亂吹！ 3 敢講上帝會顛倒是非嗎？敢講全能者會違背公義？ 4 你个子女一定係得罪佢，所以佢就使佢等受報應。 5 你應該面向上帝，迫切懇求全能者。 6 若係你恁純潔正直，上帝一定會幫助你，回復你个田園家室。 7 你起初雖然微細，到尾必定大興旺。 8 請你查看古代个智慧，研究𠊎等祖先个經驗。 9 𠊎等个生命當短，又懵懵懂懂；日仔緊過像影仔，一下就無掉。 10 𠊎等个祖先敢毋會指教你？愛聽佢等對心肚所講个話。 11 蒲草無泥敢會生？蘆竹無水敢會旺？ 12 水一燥掉，它兜最先死掉；若係還嫩，割下來也無用。 13 無敬虔个人㧯蒲草共樣；毋記得上帝，就無希望了。 14 佢等信賴該會斷个絲，佢等倚靠个係蜘蛛網。 15 佢等憑等網仔，總係蜘蛛網敢毋會爛掉？佢等揪等網仔，蜘蛛網敢能俾佢等倚恃？ 16 壞人像日頭下个雜草，藤葉盡靚，遰到滿園。 17 它个根纏等巖石，釘入石縫肚。 18 總係，若係將它挷出來，無人知它識在該位生根。 19 看啊，這就係壞人在世間个喜樂；以後別人會代佢等个地位。 20 總係，上帝永遠毋會㧒掉完全人，也絕對毋會幫助壞人。 21 佢還愛使你開聲大笑；佢還愛使你歡喜吶天。 22 佢會使恨你个人見笑；佢會俾壞人个家消滅。