Bible

1 約伯回答上主講： 2 𠊎知你萬事全部做得到；你有辦法實現所有个計劃。 3 你問過：「麼人恁無智識，懷疑𠊎个旨意？」有影，𠊎所講个，連自家也毋係恁明白；這兜事情實在奇妙，超過𠊎能了解个。 4 你識對𠊎講：「你愛注意聽𠊎个話；𠊎問你，你來指教𠊎。」 5 有影，以前𠊎識聽過你；總係這下，𠊎親目看到你！ 6 所以，𠊎想到自家又閼又見笑，就坐在泥粉㧯火灰當中後悔。 7 上主對約伯講這兜話以後，就對提幔人以利法講：「𠊎對你㧯你兩個朋友當火大，因為你等議論𠊎个話無比𠊎个僕人約伯所講个較正確。 8 這下，你等愛拿七隻牛牯、七隻羊牯，到𠊎个僕人約伯該位去，為你等自家獻燒化祭。𠊎个僕人約伯愛為你等祈求；𠊎會歡喜接納佢个祈求，毋照你等个糊塗責罰你等。你等對𠊎个議論，無比𠊎个僕人約伯講个較正確。」 9 後來提幔人以利法、書亞人比勒達、拿瑪人瑣法照上主所吩咐个去做。上主接納約伯个祈求。 10 約伯為三個朋友祈禱以後，上主恢復佢个情況，使佢个財產比以前加倍興旺。 11 佢个兄弟、姊妹，㧯以前个朋友全部來看佢，在厥屋下共下食飯。佢等對佢表示同情，為到佢對上主該位所受到个一切災難，來安慰佢。逐儕送佢一隻銀幣㧯一隻金環。 12 在約伯年老个時，上主賜福給佢，比佢以前所得到个還較多。約伯得到一萬四千隻羊仔，六千隻駱駝，一千對牛，一千隻驢乸。 13 佢也有七個孻仔，三個妹仔。 14 佢將大个妹仔安到耶米瑪，第二個妹仔安到基洗亞，第三個妹仔安到基蓮‧哈樸。 15 世間無其他个婦女像約伯該兜妹仔恁靚。姖等个阿爸使姖等㧯該兜兄弟共樣分財產。 16 這以後，約伯再食一百四十歲，親目看到自家个四代子孫。 17 恁樣，約伯享長壽，日仔滿足來離開世間。