Job 41
1 你能用魚鉤仔將海怪拉起來，抑係用索仔去䌈牠个舌乸麼？
2 你有辦法用索仔牶牠个鼻孔，抑係用鉤仔穿過牠个下頷麼？
3 牠會緊求你放牠走，抑係求你憐憫牠無？
4 牠敢會㧯你立約，肯永遠服事你麼？
5 你敢會將牠準鳥仔搞麼？你能將牠紽等，俾你个細阿妹仔搞麼？
6 打魚个能將牠準貨物來論價麼？生理人敢能將牠剖開來賣麼？
7 你敢能用捉魚个長槍刺牠个皮，抑係用魚叉刺穿牠个頭那麼？
8 你想愛將牠撳等，再一擺就毋敢了；你永遠毋會毋記得㧯牠拚係樣般得人驚。
9 看過海怪个人全部嚇倒；無人敢制伏牠。
10 牠一受到刺激，就惡擎擎；麼人敢企在牠个面前呢？
11 就像恁樣，天下萬物攏總係𠊎个啊！麼人㧯𠊎作對，還愛喊𠊎賠佢呢？
12 講到海怪，𠊎毋講你敢會清楚？你敢知牠幾有力，係樣般強大？
13 麼人有辦法剝牠个外衫，抑係刺穿牠所著个鐵甲？
14 麼人有辦法喊牠嘴打開來？牠个牙齒四周圍盡得人驚。
15 牠个背囊有一排一排个鱗甲，𢫮𢫮黏共下，像石頭恁硬。
16 逐片鱗甲相連共下，連空氣都透毋落去。
17 它兜互相黏到當住，無麼介能將它兜擘開。
18 牠一下打哈啾就會發出光；目珠像天曚光个日頭恁金。
19 牠个嘴會歕火，有火花飛出來。
20 牠个鼻孔也會歕煙出來，像鑊頭下燒蘆竹草引起个煙。
21 牠歕个氣使火𤏸起來；火就對牠个嘴噴出來。
22 牠个頸筋當硬又非常有力；堵到牠个全部驚到跳起來。
23 牠个外殼當結實，硬到無人挷得挺動。
24 牠个心硬到像石頭，像磨石恁硬。
25 牠一䟘起來，連勇士也著驚，無葛無煞，打卵退。
26 刀劍無法度傷害牠；槍㧯箭對牠也無效。
27 對牠來講，鐵像燥草，銅也像歿掉个樹仔。
28 弓箭無法度將牠逐走；拿石頭㧹牠，像禾稈打到全無礙到。
29 在牠看來，棍仔就像禾稈；牠笑飛過來个槍，連看都毋看。
30 牠个肚笥皮像當尖个瓦析；它兜像鐵耙恁樣緊耙地泥。
31 牠摝大海，水就緊滾，像鑊頭肚个油盡滾。
32 牠一泅過，水面就像會發光；牠使海水留下白色个水泡。
33 地上無其他動物能㧯牠比；牠麼介都毋驚。
34 連最高大个動物牠也看輕；牠係所有野獸个王。