Bible

1 提幔人以利法應約伯講： 2 人愛㧯你講話，你無耐心來聽係麼？總係麼人忍得住毋講話呢？ 3 你識教過盡多人，使軟弱个手有力。 4 你个話識俾會跌倒个人得到鼓勵，使衰弱个膝頭勇健起來。 5 這下災禍臨到你身上，你就驚到無勇氣擔當。 6 你个敬虔無帶給你信心係麼？你無好嫌个行為無帶給你希望係麼？ 7 你想看啊：㖠有無罪个人滅亡？㖠有正直个人行到絕路去呢？ 8 照𠊎看，耕邪惡、委毒个人，佢等所收成个就係惡毒。 9 上帝个透氣使佢等滅亡；上帝个發譴使佢等消滅。 10 大獅仔个吼聲全部恬掉；細獅仔个牙齒全部敲掉。 11 老獅仔無好食就餓死；細獅仔也全部散淨淨。 12 有一擺𠊎暗中聽到消息，𠊎耳公聽到盡細个聲； 13 大家當好睡个時，有異象來攪躁𠊎。 14 𠊎驚到愊愊掣；𠊎全身个骨頭悸悸顫。 15 一陣風吹過𠊎个面，使𠊎歸身起寒毛菇。 16 𠊎看到一種形像停在𠊎面前，總係認毋出它係麼介。這時，在恬靜中，𠊎聽到盡細个聲音講： 17 在上帝面前，麼人堪得稱做義人？在創造主面前，有麼人係純潔个？ 18 連天頂个僕人，上帝也倚恃毋得；佢識指出該兜天使个過失。 19 人係用泥做个、像住在泥屋肚，比蛀蟲較容易磧死；敢講上帝做得倚恃𠊎等？ 20 人朝晨頭還生，臨暗仔就死掉；佢永遠滅亡，也無人插佢！ 21 厥帳篷个索仔挷斷掉；佢死，也係無智慧來死。