Job 3
1 最後，約伯開嘴咒詛自家个生日。
4 願該日變做烏暗；願上帝莫紀念該日，莫俾光照它。
5 願它成做烏暗死蔭个一日。願烏雲遮蓋它，願天狗食日來嚇它。
6 願該暗晡被烏暗捉走，無算在年肚个日仔㧯月份中。
7 願該暗晡無生育个事，也無歡喜快樂个聲。
8 願該兜會喊醒海怪个人，該兜變邪術个人出來咒詛該暗晡。
9 願該暗晡个天光星變暗；也看毋到天光日出。
10 因為該暗晡無將懷𠊎个子宮門關掉，卻害𠊎堵到恁多苦難。
11 做麼介𠊎毋一出世就斷氣？抑係吂出母胎就死掉？
12 做麼介吾姆將𠊎揇在膝頭頂？做麼介姖有乳給𠊎食？
13 若係𠊎該時死掉，這下早就安息，
14 㧯世間為自家重起王宮个君王、官員共下睡，
15 㧯歸屋裝滿金銀个王子共下安息，
16 㧯落胎、吂見光个孲𤘅仔共樣。
17 在墳墓肚，壞人停止作惡，操勞个人得到安息。
18 連被人捉去个人也享受自由，毋會再聽到監工喝喝咄咄；
19 無分貴賤大細，全部在該位，連奴才也得到自由。
20 做麼介俾艱苦个人還有日光？做麼介俾憂傷个人還有生命？
21 該兜人想愛死，偏偏毋會死；佢等想尋死，贏過尋財寶。
22 佢等入到墳墓，正有正經个喜樂。
23 前途茫茫个人，四面被上帝圍困等，做麼介有光賜給佢？
24 𠊎透大氣準飯食；𠊎緊噌像水流毋會斷。
25 𠊎最驚个事全部出現；所驚个事偏偏臨到𠊎。
26 𠊎無平安，得毋到安息；總係，操煩毋識停過。