Bible

Job 23

Chinese (T) - TNV2012

1 約伯應講：

2 今晡日𠊎還係當毋甘願，怪怨上帝；佢个責罰實在忒重，害𠊎噌到會死。

3 𠊎當希望知愛去㖠位尋佢，知愛樣般到佢所住个地方。

4 𠊎愛向佢申訴案情，為𠊎自家辯解。

5 𠊎愛看佢樣般回答𠊎；𠊎愛聽佢㧯𠊎講麼介。

6 上帝會用佢个大權能壓𠊎麼？絕對毋會！佢一定會聽𠊎辯解。

7 𠊎做人正直，佢會俾𠊎㧯佢理論；到尾佢會做裁決，佢會判𠊎無罪。

8 總係，𠊎向東尋，上帝無在該位；𠊎向西尋，也尋毋到佢。

9 上帝在南片工作，𠊎看毋到佢；佢在北片做事，𠊎也見毋到佢。

10 雖然恁樣，佢清楚知𠊎所行个逐步路；佢考驗𠊎以後，就會知𠊎像黃金恁純。

11 𠊎緊跈等佢个腳步；𠊎遵守佢个道路，毋敢偏離。

12 𠊎時時刻刻遵守佢个命令；𠊎遵守佢个旨意，無從自家个慾望。

13 佢永遠無變，無人能抵抗佢；佢心所願个，就行出來。

14 佢愛完成對𠊎所計劃个；佢還有盡多恁樣个計劃。

15 𠊎在佢面前驚到愊愊掣，𠊎一想到佢就驚到會死。

16 上帝使𠊎个膽嚇到爛掉；全能者使𠊎驚到愊愊掣。

17 就算烏暗俾𠊎个目珠看毋到，使𠊎著驚个毋係烏暗，係上帝。