Job 22
1 接等，提幔人以利法應約伯講：
2 人對上帝敢有麼介路用呢？最聰明个對上帝有好處麼？
3 你正直个行為會俾全能者歡喜麼？你个良善敢會俾上帝得到利益嗎？
4 上帝敢會因為你敬畏佢來責罰你、審判你嗎？
5 毋會！佢責罰你係因為你个罪盡重，你个罪惡多端。
6 你為到愛向兄弟討債，迫佢將衫褲脫到光光。
7 嘴燥个人你毋給佢水啉；肚笥枵个人你毋給佢食。
8 你利用你个勢力㧯地位佔領所有个土地。
9 你喊寡婦空手轉去；你打斷孤兒个手骨。
10 因為恁樣，這下你周圍有陷阱；得人驚个事會忽然間包圍你。
11 烏暗遮等你，使你看毋到；大水會浸掉你！
12 上帝敢毋係在高天个頂高？佢低頭下來看最高个星仔。
13 總係你大膽問：「上帝知麼介呢？佢敢會穿過雲層來審判𠊎等？」
14 你恅到有烏雲遮等佢，使佢看毋到；你認為佢在穹蒼頂高行來行去定定。
15 壞人行過个老路，你愛跈等行係麼？
16 佢等个死期還吂到，就被大水連根打走。
17 佢等對上帝講：「你閃開！全能者能拿𠊎等樣般？」
18 總係，使佢等興旺个係上帝；壞人个想法，𠊎無法度贊成。
19 義人看到佢等个結局就歡喜；無辜个人一看到就恥笑佢等。
20 壞人个財產全部消滅掉去，賸到个一切也被火燒淨淨。
21 所以，約伯啊，你愛順從上帝，㧯佢和好，恁樣，佢就會賜福給你。
22 你愛接受佢个教訓，將佢个話記在心肚。
23 你若係轉到全能者該位，除掉你屋下所有不義个行為，上帝就會使你興旺。
24 愛將你个黃金豁在湳泥肚，將精金㧒到燥掉个河壩底。
25 全能者就會做你貴重个黃金，也會像白銀高高為你囤起來。
26 恁樣，你就會仰望全能者，同時會對上帝得到喜樂。
27 你向佢祈禱，佢會聽你个祈求；你也愛還你所許个願。
28 你所做个工作全部會成功；你所行个路一定光明燦爛。
29 上帝打橫驕傲个人，佢愛拯救謙卑个人。
30 你無罪，佢就救你；你做人正直，就會得到拯救。