Jeremiah 9
1 願𠊎个頭那係水井，目珠係目汁个泉源！𠊎做得日夜為被人㓾死个同胞來噭。
2 願𠊎在曠野有出外人歇睏个所在，使𠊎做得遠遠避開同胞。因為佢等全係行姦淫、係全無忠心个一群。
3 佢等个舌乸彎來彎去像弓一樣，佢等隨時講花撩像射箭共樣；佢等得到權勢毋係靠講真實話，完全係用騙个。上主講：「𠊎个子民長透做壞事，根本毋認識𠊎。」
4 逐個人全部愛提防親友，親兄弟也信用毋得；因為兄弟全部㧯雅各共樣恁詭詐，朋友來往全部搬弄是非。
5 逐儕騙朋友；無人講老實話；佢等教人講花撩。佢等一直犯罪，𤸁到毋知愛悔改；
6 佢等一日到暗詐欺人、欺負人。上主講：「佢等根本毋肯承認𠊎。」
7 所以，上主—萬軍个元帥恁樣講：「看啊，𠊎愛鍛鍊𠊎个子民，考驗佢等。𠊎个子民做恁壞个事，若無責備佢等，樣做得呢？
8 佢等个舌乸像㓾人个利箭；佢等緊講花舌。逐儕對鄰舍嘴講平安个話，總係心肚設計愛陷害佢。
9 𠊎樣做得無為這兜事來責罰佢等呢？𠊎樣做得無報應像恁樣个國家呢？」
10 𠊎講：𠊎愛為山來悲哀大噭，為曠野个草埔唱悲傷个歌；因為它兜燒到光光，無人經過，也聽毋到牛羊个聲音，連飛鳥野獸全部走淨淨。
11 上主講：𠊎愛使耶路撒冷變做亂石堆，成做野狗个竇；𠊎愛使猶大个城鎮荒廢，毋會再有人住。
12 𠊎問：「上主啊，做麼介這土地會荒廢，像沙漠恁燥旱，無人經過呢？麼人有恁聰明，會明白這道理呢？你識向麼人說明，使佢會向別人解釋這道理呢？」
13 上主應講：「這係因為𠊎个子民豁掉𠊎為佢等設立个教訓，毋聽從𠊎个話，毋實行𠊎个命令。
14 佢等當硬頸，強強愛跈祖先所教个去拜眾巴力。
15 所以，𠊎—上主、萬軍个元帥、以色列个上帝恁樣宣佈：𠊎愛使這子民食苦果，啉毒水。
16 𠊎愛將佢等分散到各國，到佢等㧯祖先全毋識聽過个所在去。𠊎愛使敵人逐佢等，將佢等全部㓾死。」
17 上主—萬軍个元帥恁樣講：你等愛想看仔：愛請代人噭个婦人家來噭，請專門唱哀歌个細妹仔來唱。
18 人民講：愛催姖等遽遽來為𠊎等唱哀歌，唱到𠊎等大噭、目汁雙流！
19 鍚安城傳出哀傷个聲講：樣會恁澇潰！樣會恁見笑！𠊎等無離開家鄉做毋得；𠊎等个屋被人拆掉了。
20 𠊎講：婦人家啊，愛聽上主个話；你等愛注意聽佢个話。愛教你等个妹仔樣般噭，逐儕愛互相學唱哀歌。
21 死亡對窗門爬入來，進入𠊎等个城堡；死亡打橫街路个細人仔，消滅廣場个後生人。
22 滿遍橫等屍體，像田野个糞堆，又像割跌掉个麥串，無人來拈。上主命令𠊎恁樣宣佈了。
23 上主恁樣講：聰明人毋好誇口自家个聰明；勇士毋好誇口自家个勇氣；有錢人毋好誇口自家个錢財。
24 人若愛誇口，應該誇口了解𠊎、認識𠊎；因為𠊎係上主，𠊎實行不變个慈愛。在世間𠊎執行公平，伸張正義；因為這兜事係𠊎所歡喜个。𠊎—上主恁樣宣佈了。
25 上主講：「看啊，日仔會到了！𠊎愛責罰所有單單肉體受割禮、總係心靈無受割禮个人：
26 就係埃及人、猶大人、以東人、亞捫人、摩押人、㧯該兜住在曠野剃掉頭那周圍个頭那毛个民族。因為各國个人雖然肉體都受割禮，總係佢等㧯以色列人个心靈也全部無受割禮，無遵守割禮所象徵个約。」