Jeremiah 8
1 上主講：「到該日，敵人會將猶大个王、官長、祭司、先知，㧯耶路撒冷人民个骨骸，全部對墳墓肚挖出來，
2 擺在日頭、月光、㧯星仔下背。這兜天體就係佢等生前所愛慕、服事、跈從、卜卦、敬拜个。這兜骨骸無人會去收集起來埋掉，全部會變做地面上个垃圾。
3 這隻邪惡民族賸到个人會在𠊎分散佢等去个所在，求死毋求生。𠊎—上主、萬軍个元帥恁樣宣佈了。」
4 上主吩咐𠊎向佢个子民恁樣講：「人跌倒，敢無想愛䟘起來？人行差路，敢無想愛回頭？
5 你這兜耶路撒冷人啊，你等做麼介悖逆到底呢？你等一直行詭詐，毋肯轉到𠊎這位來。
6 𠊎當注意聽，總係你等無講老實話。無人為自家个壞行為悔改；無人自家反省講：『𠊎到底做麼介毋著？』逐儕人照自家个意思去做，就像馬仔走等去戰場。
7 連空中个鸛鳥都知來去个節期，定期飛轉來；班鳩、燕仔、白鶴仔也全部照時節遷徙。總係𠊎个子民啊，你等偏偏毋知𠊎个法則！
8 你等樣做得自誇聰明、講你等明白𠊎个法律呢？其實，𠊎个法律已經被詭詐个經學教師改做假个法律了。
9 你等个聰明人會堵到見笑，驚到愊愊掣，被人捉到。佢等拒絕𠊎个話，還有麼介智慧好講呢？
10 所以，𠊎愛將佢等个𡜵娘送給別人，田地也交給新个主人；因為佢等無論地位高低全部貪不義个錢財，連先知㧯祭司也全部詐欺人民。
11 𠊎子民个著傷，佢等也無認真醫治。佢等講：『平安！平安！』其實無平安。
12 佢等做恁得人惱个事應當知見笑，總係佢等毋知見笑，也毋會面紅。所以，佢等會㧯別人共樣跌倒。𠊎責罰佢等个時，佢等就會橫到貼貼。𠊎—上主恁樣宣佈了。」
13 上主講：「𠊎愛將佢等所有个全部搶走，交給該兜來佔領這地方个人；到尾，葡萄樹頂毋會有葡萄，無花果樹頂也毋會有無花果，連葉仔也全部燥掉。」
14 上帝个子民問：「𠊎等做麼介還坐等毋挺動呢？䟘起來，入來去防衛个城，就係死在該位也好！上主—𠊎等个上帝已經定𠊎等死罪。佢給𠊎等毒水啉，因為𠊎等得罪佢。
15 𠊎等期待平安，希望得到醫治，總係無效果，反轉嚇到會死。
16 敵人已經到但，𠊎等聽到戰馬噴氣。戰馬大聲嘶，全地大震動。敵人會來打壞𠊎等个土地㧯地上个一切；佢等會來消滅𠊎等个城市㧯住在其中个人民。」
17 上主講：「看啊，𠊎愛將毒蛇放在你等當中，用法術也逐牠兜毋走；牠兜會咬你等。」
18 𠊎个心非常悲傷，無法度醫好，像會昏掉一樣。
19 𠊎遠遠就聽到同胞悲傷个聲講：「上主無在錫安係麼？錫安个王無在城肚係麼？」上主講：「佢等做麼介拜偶像？做麼介拜外國虛假个神明，來惹𠊎發譴呢？」
20 人民講：「熱天過掉，收成結束了，𠊎等還係吂得救！」
21 耶利米講：同胞受傷害，𠊎也受傷害；𠊎非常悲傷，著驚到會死。
22 敢講基列無膏藥係麼？敢講該位無醫生係麼？做麼介𠊎个同胞無得到醫治呢？