Jeremiah 30
1 上主个話臨到耶利米，講：
2 「上主—以色列个上帝恁樣講：你愛將𠊎㧯你講過所有个話全部寫在書底背，
3 因為時間會到，𠊎个子民對猶大㧯以色列被人捉走个，𠊎愛俾佢等轉到故鄉，重整家園。𠊎愛帶佢等轉到𠊎賜給佢等祖先个土地；佢等會重新得到這土地。𠊎—上主恁樣宣佈了。」
4 上主對以色列㧯猶大个人民講：
5 𠊎聽到會俾人愊愊掣个聲，這係得人驚个聲，無平安个聲！
6 去問看仔，係毋係有男人愛𫱔細人仔？做麼介𠊎看到逐個男人用雙手揇等肚笥，像係愛𫱔个婦人家？做麼介逐個男人面色癧青呢？
7 慘了！得人驚个日仔會到了！吂識有恁樣个日仔；這係𠊎子民雅各受難个時期，總係佢等一定會得救。
8 上主—萬軍个元帥恁樣講：「到該日，𠊎愛拗斷掛在佢等頸筋个軛，挷斷佢等身上个鎖鍊，佢等毋會再做外國人个奴才。
9 佢等愛事奉𠊎—上主、佢等个上帝，㧯𠊎為佢等興起來承接大衛个王。
10 𠊎个僕人雅各啊，毋使驚；以色列人啊，毋使著驚。𠊎愛對遠遠个地方，你等被人捉去个國家將你等个子孫救出來。雅各愛轉來故鄉，安居樂業，無驚麼介。
11 因為𠊎㧯你共下，愛拯救你。𠊎愛將𠊎逐你去个該兜國家完全消滅；總係𠊎毋會消滅你。𠊎愛用公正管教你，做毋得毋責罰你。𠊎—上主恁樣宣佈了。」
12 上主恁樣講：你个受傷無辦法醫，傷口無法度醫好了。
13 你个案仔無人會代你出頭，像無藥好膏，無藥好醫。
14 愛惜你个人全部毋記得你；佢等毋會再來關心你。𠊎愛像攻擊敵人恁樣攻擊你，當殘忍來責罰你；因為你當積惡，罪當重。
15 做麼介還為你个受傷緊噭？你个傷口無法度醫好了。因為你當積惡，罪當重，𠊎正恁樣責罰你。
16 總係，吞食你个，會被人食掉；你所有个敵人會被人捉走。欺負你个，會被人欺負；搶你个，會被人搶。
17 雖然你个敵人講：「錫安係被人㧒掉个，無人關心个」；總係𠊎愛醫你个傷口，使你好起來。𠊎—上主恁樣宣佈了。
18 上主恁樣講：看啊，𠊎愛復興雅各个帳篷，也愛憐憫佢个家園；𠊎愛使佢重建耶路撒冷，在原來个地方起王宮。
19 佢等會發出感謝个歌聲；佢等會歡喜快樂。𠊎愛使佢等个人口增加，毋會減少。𠊎愛使佢等有尊榮，毋會再受侮辱。
20 佢等个子孫會像老頭擺恁蒙恩，佢等个國家定著會在𠊎面前企起來；𠊎愛責罰所有欺負佢等个人。