Isaiah 43
1 雅各啊，創造你个上主恁樣講；以色列啊，使你成做人个上主這下恁樣宣佈：毋使驚！因為𠊎救贖你；𠊎指名喊你，你係屬𠊎个。
2 你對水中經過，𠊎愛㧯你共下；你過大河壩，水毋會打走你。你對火中行過，毋會被火熝到，火焰也毋會燒到你。
3 因為𠊎係上主—你个上帝；𠊎係以色列神聖个上帝—你个救主。𠊎愛拿埃及來贖轉你个自由；𠊎愛拿古實㧯西巴來代你還債。
4 在𠊎看來，你係樣般寶貴；𠊎惜你，𠊎看重你。𠊎甘願犧牲其他國家來拯救你，犧牲別人來換你个生命。
5 毋使驚，因為𠊎㧯你共下！對遠遠个東方、西方，𠊎愛𢱋你个子孫轉來故鄉。
6 𠊎愛命令北方放佢等走；𠊎愛指示南方毋好強留佢等。俾𠊎个子女對天涯海角，轉到自家个故鄉。
7 佢等係𠊎个子民，係𠊎為到自家个榮光創造个，係𠊎自家所造成个。
8 上主講：將𠊎个子民傳到法庭來。佢等有目珠，總係看毋到！佢等有耳公，總係聽毋到！
9 將世界萬國萬民全部傳到法庭來。㖠國个神明識預言這下所發生个事？㖠個識預言先前所發生个事？喊該兜神明帶佢等个證人來，證明佢等無毋著，證實佢等个話真實可靠。
10 以色列人啊，你等係𠊎个證人；𠊎選你等做𠊎个僕人，愛俾你等認識𠊎，相信𠊎，知𠊎係惟一个上帝。除了𠊎，無別个上帝；過去無，將來也毋會有。
11 只有𠊎係上主；𠊎以外無救主。
12 𠊎識啟示，𠊎識拯救，𠊎識講過；在你等中間無別个神明做過恁樣个事。𠊎—上主這下宣告：只有𠊎係真神！你等係𠊎个證人。
13 𠊎永遠係上帝。無一儕能救人脫離𠊎个手；無一儕能改變𠊎所做个。
14 上主—你等个救贖主、以色列神聖个上帝恁樣講：為到愛拯救你等，𠊎會派軍隊攻打巴比倫；𠊎會攻破它个城門；巴比倫人民个歡呼會變做哀傷。
15 𠊎係上主—你等神聖个上帝，係以色列个創造者—你等个君王。
16 古時節，上主在海洋中開一條路，在波浪中開一條大路。
17 佢使強大个軍隊—戰車㧯戰馬全部毀滅。佢等全部橫落去，䟘毋起來了；佢等像燈心剪掉，火就烏掉。
18 總係上主講：毋好緊唸先前个事；毋好緊愐古早个事。
19 看啊，𠊎愛做一件新个事，事情已經發生，敢講你等還毋知！𠊎愛在曠野開大路，在沙漠挖河壩。
20 野獸、野狗㧯鴕鳥全部會敬重𠊎；因為𠊎在曠野開水源，使沙漠有河壩，使𠊎揀選个子民有水啉。
21 佢等係𠊎為自家造个子民；佢等會向𠊎唱讚美个詩歌！
22 上主講：總係雅各啊，你無敬拜𠊎；以色列啊，你想到𠊎就當懶頭。
23 你無向𠊎獻燒化祭个羊，也無獻尊敬𠊎个祭物。𠊎無要求祭物，增加你个負擔，也無要求乳香，來麻煩你。
24 你並無為𠊎買菖蒲，也無用祭物个油使𠊎飽足。反轉，你个罪惡成做𠊎个負擔；你个過犯帶給𠊎麻煩。
25 總係，𠊎係惟一个上帝。𠊎會為自家个名赦免你个過犯；𠊎無愛報應你个罪惡了。
26 𠊎等共下來去法庭；你做得申訴。你做得提出理由，證明你有理。
27 你个祖先犯罪，你該兜領袖悖逆𠊎。
28 所以，𠊎使聖殿个官長見笑；𠊎徹底毀滅以色列，使雅各受到侮辱。