Isaiah 42
1 上主講：看哪，𠊎个僕人，𠊎扶持佢；𠊎揀選佢，佢係𠊎心所歡喜个。𠊎將𠊎个靈賜給佢；佢愛為萬國帶來正義。
2 佢毋會盡喊，也毋會吵鬧；佢毋會在街項大聲講話。
3 磧壞个蘆竹，佢毋會將它拗斷；會烏个燈火，佢毋會將它歕掉。佢愛忠心將正義帶來。
4 佢毋會失望也毋會失志；佢愛在地上建立正義；海島个人攏總仰望佢个法律。
5 上帝創造諸天，鋪設穹蒼；佢造大地㧯地上所有个生物；佢賜給人生命，使人會透氣。主上帝向佢个僕人恁樣宣佈：
6 𠊎—上主照公義來呼召你；𠊎會牽等你个手，保守你。𠊎愛通過你㧯世間人立約；𠊎愛使你成做萬國个光。
7 你愛去開瞙目个目珠，𢱋坐監个人出監獄，使烏暗地牢中个人得自由。
8 𠊎係上主，這係𠊎个名。𠊎定著毋將𠊎个榮耀歸給假神，也毋將愛給𠊎个稱讚歸給雕刻个偶像。
9 看哪，𠊎所預言个事已經實現。這下𠊎愛㧯你等講兜新个事，在事發生以前，𠊎先㧯你等講明。
10 愛向上主唱一首新歌；全世界愛頌讚佢！大海㧯其中个生物全部愛讚美佢；海島㧯島上个人民全部愛頌揚佢！
11 沙漠㧯其中个城市全部愛大聲唱歌；基達个人民愛讚美佢；住在西拉个人全部愛歡呼，在山頂大聲喊。
12 海島个人民全部愛榮光上主；佢等愛頌讚佢！
13 上主像勇士出去相㓾；佢軍裝著好，激動熱心去。佢大聲盡喊，出戰攻擊敵人。
14 上帝講：𠊎已經盡久無出聲，恬恬無搭𠊎个子民。這下𠊎愛行動了，像𫱔子个婦人家盡命仔喊。
15 𠊎愛使大細山岡荒廢，使草木枯燥。𠊎愛使河壩變做沙埔，使陂塘燥掉。
16 𠊎愛𢱋瞙目个子民，行毋識行个路；𠊎愛使佢等面前个烏暗變做光明，使彎斡个路變平平个大路。𠊎愛實現這兜事，絕對毋會豁掉佢等。
17 該兜相信假神个人一定會打輸；倚靠偶像个人一定會堵到見笑。
18 上主講：你等耳聾个啊，愛聽！你等青盲个啊，愛看！
19 世上有麼人比𠊎个僕人還較青盲？有麼人比𠊎个使者還較耳聾？到底有麼人比𠊎揀選个子民、上主个僕人還較青盲？
20 以色列啊，你看過盡多，總係看毋清楚；你聽過盡多，總係聽無了解。
21 上主一心愛伸張正義；佢歡喜使法律得到尊重、發揚光大。
22 總係佢个子民被人搶劫；佢等被人關在地牢肚，被人囥在監獄中。佢等被人搶，無人救；佢等被人捉走，無人放佢等轉來。
23 你等當中有人愛聽這兜話麼？從今以後會注意聽麼？
24 係麼人將以色列交給侵略者？係麼人將雅各交給搶劫个人？敢毋係上主，因為𠊎等全部得罪佢。𠊎等毋肯行佢个道路；𠊎等無遵守佢个法律。
25 所以，佢向𠊎等大發譴，使𠊎等受到戰爭个痛苦。戰爭圍困𠊎等，𠊎等還係無學到教訓；烈火燒到𠊎等，𠊎等還係無半點感覺。