Isaiah 29
1 上帝个祭壇，就係耶路撒冷本身，也會堵到災難了！大衛識安營个城會承受災難了！就算一年一年過去，節期照常輪流下去，
2 上帝還係愛向這稱做「上帝祭壇」个城降災難。會有悲傷哀噭个聲音；全城會變做一座血漬漬个大祭壇！
3 上帝愛在四周圍安營攻擊這城，圍困這城，起高臺來攻擊它。
4 耶路撒冷个人毋敢出聲，就跍在地上，用喉嗹細聲講話，像鬼講話恁樣對地泥下傳出來。
5 耶路撒冷啊，歸群攻擊你个仇敵全部會像塵灰一樣被風吹散；該兜得人驚个軍隊會像礱糠被風吹走。這事忽然間會臨到，
6 上主—萬軍个元帥愛用大雷公、大地動㧯盡大个聲，愛派龍捲風、大風差㧯烈火來拯救你。
7 該時，來攻擊上帝祭壇个各國軍隊全部會失敗；佢等个武器㧯軍備全部會像發夢，像暗晡時个異象恁樣消失。
8 像餓到會死个人在夢中緊食，醒過來个時還係肚飢；像渴到會死个人在夢中大口啉水，醒過來个時共樣嘴燥；攻擊錫安山个各國軍隊也係恁樣。
9 你等繼續做戇檔个事啊！繼續揞目珠像青盲个人啊！你等還吂啉酒已經酒醉，一滴酒還吂啉已經搖搖擺擺！
10 上主使你等頭昏昏想愛睡；佢揞等你等个目珠。先知、先見應該係人民个目珠，總係上帝遮等佢等个目珠。
11 所有異象个意義全部對你等囥起來，像一本封等个書卷。你等拿這書卷去請有學問个人讀，佢一定會㧯你等講，佢無法度讀，因為這書卷係封等个。
12 你等請毋識字个人讀，佢會㧯你講，佢毋會讀。
13 主講：「這兜人民認為佢等在該位敬拜𠊎呢！佢等用嘴唇皮尊敬𠊎，總係佢等个心遠遠離開𠊎。佢等个宗教係人間个規條、傳統，讀到熟熟、背起來定定。
14 所以，𠊎愛在想毋到个時節打擊佢等，使佢等著驚。佢等當中，聰明人个聰明會全無價值；精明人个精明會完全無用。」
15 該兜將計謀囥等毋俾上主知个人會堵到災難了！佢等在暗中計劃，恅到無人看到，無人知佢等在該位做麼介。
16 佢等顛倒是非。到底燒缶師傅較大呢，抑係缶仔較大呢？受造个東西樣能對製造人講：「你並無造𠊎」？抑係對佢講：「你無罅聰明」？
17 就像俗語講：「過一站時間，黎巴嫩个樹林會變做肥田；肥田會變做樹林。」
18 到該日，耳聾个會聽到讀書个聲；一直在烏暗中个瞙目个會看得到。
19 卑微个人會接受上主所賜个喜樂；窮苦个人會頌讚以色列神聖个上帝。
20 欺負人个會被人除滅；得罪上帝个會受責罰；罪人全部會受消滅。
21 譭謗別人个，阻擋公道个，冤枉誠實人个，全部會被上帝消滅。
22 所以，該識拯救亞伯拉罕个上主對雅各个後代—以色列恁樣講：「𠊎个子民啊，你等毋使再受羞辱了，你等个面毋使再見笑到面紅際炸了。
23 你等看到𠊎賜給你等个子孫，你等就會承認𠊎係以色列神聖个上帝。你等會尊敬𠊎，敬畏𠊎。
24 迷迷糊糊个人會學精；嫌東嫌西个人會接受教導。」