Isaiah 28
1 撒馬利亞會堵到災難了！它像花做个冕旒，以色列該兜酒鬼啉到醉醉緊誇口它；它像在盡肥山壢頂个花，盡靚又光榮，總係盡遽會謝掉。
2 看哪，主準備強大有力个人來攻擊這城。佢來个時，像起大風、落冰雹，像做大水沖入全地。
3 撒馬利亞像以色列个酒鬼所誇口个冕旒，會被人踐踏，㧒在地上；
4 它像在盡肥山壢頂个花，盡靚又光榮，總係盡遽會謝掉；它又像熱天一到就打子个無花果，惹人注目，一熟就被人摘下來食掉。
5 在該日，上主—萬軍个元帥會像盡靚又光榮个冕旒，戴在災難過掉還賸到个子民頭那頂。
6 佢愛賜公正个心給法官，賜勇氣給防守城門、打退強敵个人。
7 先知㧯祭司也醉到橫笐橫袋；佢等啉酒啉到糊裏糊塗。該兜先知全部醉到毋明白上帝給佢等个異象，該兜祭司也啉到無法度分別是非。
8 筵席个桌頂盡亂，全部係嘔出來个垃圾東西。
9 大家怪怨𠊎講：「這先知到底教麼介？麼人愛聽佢講个呢？佢愛去講給堵堵斷乳个細人仔聽正著！
10 佢敢想愛一隻一隻字、一隻一隻音，這一些仔、該一些仔來教𠊎等！」
11 若係你等毋聽𠊎个話，上帝愛派外國人，用打結个舌乸講奇怪个話來教訓你等。
12 佢識對你等講：「你等愛使痶个人得到安息，恁樣你等在這所在正會得到安息，得到爽快」，總係你等毋聽佢个話。
13 所以，上主愛一隻一隻字、一隻一隻音，這一些仔、該一些仔來教你等。該時，你等會行一步，橫一擺；你等會跌倒受傷，被人網到、捉到。
14 你這兜在耶路撒冷管理人民，當傲慢个領袖啊，愛聽上主對你等講个話！
15 你等恅到已經㧯死亡簽契約，㧯陰間打合同了，所以自認在敵軍經過个時就毋會死；你等恅到講花撩㧯欺騙人也會平安無事。
16 這下至高个上主愛對你等講：「𠊎在錫安建立堅強穩固个地基，在該位放貴重个房角石；有信心个人就毋使著急。
17 在這基礎頂，𠊎愛用公義做量索，用誠實做線鉈。」冰雹會打爛你等所倚靠个花撩；大水會浸掉你等个安全。
18 你等㧯死亡簽个契約會廢除，㧯陰間打个合同會取消。敵軍經過个時，你等就被人踐踏。
19 這災難一擺又一擺來打擊你等，你等會日夜繼續忍受痛苦。上帝逐擺給你等新个信息，全部會帶來新个著驚！
20 你等就像俗語所描寫个：「眠床忒短，伸腳毋得；被骨忒狹，蓋毋到全身。」
21 上主愛像佢在比拉心山㧯基遍山壢相㓾所做个恁樣，起來完成佢个工，係希奇个工；佢一定會成就佢个事，係奇怪个事。
22 毋好看輕𠊎對你等个警告！若無，你等就毋使想愛閃掉這個壞運。𠊎已經聽到了，至高个上主—萬軍个元帥決定愛毀掉歸隻國家。
23 你等愛留心聽𠊎个話，注意聽𠊎㧯你等講个。
24 敢講在耕種个時單淨犁田㧯鬆泥就做得係麼？
25 耕田人有一日將田地犁好耙平，就委種，種大茴香抑係細茴香。佢愛種一行一行个小麥抑係大麥，並在田个邊堘種較特別个五榖。
26 佢知愛樣般耕種，因為上帝有教佢。
27 佢毋會用大棍仔打大茴香抑係細茴香；佢用个係堵好大个棍仔。
28 佢也毋會一直使用風車，毋肯停，造成麥仔个損害。佢知愛樣般用打榖車，輕輕仔輾過麥堆，使麥稈㧯麥仔分開，毋會損壞麥仔。
29 這種智慧全部係上主—萬軍个元帥賜給佢个。上帝个計劃樣般奇妙；佢个智慧樣般偉大。