Genesis 23
1 莎拉在世享壽一百二十七歲。
2 莎拉死在迦南个基列‧亞巴(就係希伯崙)。亞伯拉罕為姖悲傷大噭。
3 亞伯拉罕離開停莎拉屍體个地方，來到赫人个所在，講：
4 「𠊎係暫住在你等當中个外族人；請賣一垤地給𠊎做墓地，好俾𠊎埋吾𡜵娘。」
5 赫人應亞伯拉罕講：
6 「先生請聽！你在𠊎等當中係一位尊貴个王子。請在𠊎等最好个墓地，埋葬你个𡜵娘；大家願意給你墓地埋葬姖。」
7 亞伯拉罕就䟘起來，跪在該地方个赫人面前，
8 講：「若係你等願意俾𠊎在這位埋葬𠊎个𡜵娘，請你為𠊎求瑣轄个孻仔以弗崙，
9 將田尾个麥比拉窿賣給𠊎；請佢在你等面前照實價賣給𠊎做墓地。」
10 以弗崙㧯其他赫人共下坐在城門口集會个地方；愛俾入城个人也聽得到，佢就大聲對亞伯拉罕講：
11 「先生，毋好恁樣，請聽！𠊎愛將該垤田連田肚个窿送給你；𠊎愛當同胞个面前送給你，俾你埋葬若𡜵娘。」
12 亞伯拉罕又跪在赫人面前，
13 也用大家聽得到个聲對以弗崙講：「請聽𠊎講，你若肯，該垤田地𠊎愛用買个，求你將錢收起來，𠊎就做得在該位埋葬𠊎个𡜵娘。」
14 以弗崙應亞伯拉罕講：
15 「先生請聽，該垤地个價值係四百隻銀幣，你㧯𠊎中間這兜錢算麼介呢？請將你个𡜵娘埋在該位！」
16 亞伯拉罕同意，就照以弗崙在赫人面前講出來个價錢，將該時通用个錢四百隻銀幣交給佢。
17 恁樣，以弗崙在幔利東片麥比拉个地產權就屬亞伯拉罕；這地產包含田地㧯其中个窿，並所有个樹木。
18 聚集在城門口該兜赫人，全部承認這地產權屬亞伯拉罕。
19 亞伯拉罕就將𡜵娘莎拉埋葬在迦南地幔利東片麥比拉窿肚。(幔利就係希伯崙)。
20 原來屬赫人該垤田地㧯田肚个窿，就恁樣成做亞伯拉罕私人个墓地。