Bible

1 以後，𠊎聽到上帝大聲喊：「你等受派來責罰這城市个人啊，帶你等个武器來！」 2 即時有六個人帶等武器對聖殿外院个北門過來；其中有另外一個著麻紗个衫、帶等筆墨。佢等入來，企在銅个祭壇堘頭。 3 以色列上帝个榮光離開基路伯，徙到聖殿个入口；這榮光本來停在基路伯頂高。上主喊該著麻紗个衫、帶等筆墨个，㧯佢講： 4 「你去，行透全耶路撒冷，堵到因為城肚發生可惡个事悲傷歎息个人，愛在佢等額頭做記號。」 5 𠊎又聽到上帝㧯其他个人講：「你等愛跈在佢後背，行透全城去㓾人，出手盡㓾，毋好放過一個人，毋使憐憫。 6 無論係老人家、後生人、細妹仔、婦人家抑係孲𤘅仔，全部愛㓾掉；總係做毋得㓾該兜額頭有記號个人。這下就對𠊎个聖所這位開始出手！」所以佢等對企在聖殿肚个長老開始㓾。 7 上帝對佢等講：「將屍體堆滿聖殿个庭院，將聖殿打垃圾！這下就出去！」所以佢等就出去在城肚㓾人。 8 佢等去㓾人个時，𠊎自家一儕留下來。𠊎伏在地泥下喊：「至高个上主啊，你斷真愛向耶路撒冷拚淨大發譴、將以色列賸下來个人全部滅淨淨係麼？」 9 上帝應講：「以色列人㧯猶大人个罪惡盡重。全國逐所在都有兇殺；耶路撒冷充滿冤枉。佢等講，𠊎—上主㧒掉佢等个國家了，毋看顧佢等。 10 所以，𠊎還係毋饒佢等，毋憐憫佢等。佢等樣般款待別人，𠊎也愛樣般款待佢等。」 11 後來，該著麻紗个衫、帶等筆墨个轉來，向上主報告：「𠊎已經照你个命令做了！」