Ezekiel 10
1 𠊎昂頭看基路伯頭那頂个穹蒼，頂高有一座就像係用藍寶石造个寶座。
2 上帝對該著麻紗衫个人講：「你入去，對基路伯下背个輪仔當中用手捧出𤏸等个火炭，然後將火炭委在城肚。」𠊎看到佢入去。
3 佢入去个時，基路伯企在聖殿个南片；有雲充滿內院。
4 上主个榮光離開基路伯，停在聖殿門口；接等，有雲充滿聖殿。上主个榮光充滿歸隻庭院。
5 基路伯个翼胛所發出个聲在外院也做得聽到；當像全能上帝講話个聲音。
6 上主命令該著麻紗衫个人，去基路伯下背个輪仔當中拿火；佢就入去，企在其中个一個輪仔堘頭。
7 其中一個基路伯伸手到佢等中間个火堆，拿兜火炭放在該著麻紗衫个人手項。佢一拿到就離開。
8 𠊎看到該兜基路伯个逐隻翼胛下有一隻手，就像人个手。
9 𠊎又看到四隻共樣个輪仔，逐個基路伯堘頭有一隻輪仔像寶石恁金；
10 逐隻輪仔旁邊另外有一隻輪仔，輪仔㧯輪仔互相直角相切。
11 基路伯愛徙挺動个時，做得向逐方向徙，毋使轉身；佢等毋使轉身，歸隻就能照自家个意思徙挺動。
12 佢等个身體、背囊、手、翼胛㧯輪仔全部滿有目珠。
13 講到這兜輪仔，𠊎耳公聽到講：它兜係第一個異象中共樣會挺動个輪仔。
14 逐個基路伯有四隻面：第一隻像牛个面，第二隻像人个面，第三隻像獅仔个面，第四隻像鷹鳥个面。
15 基路伯飛上去了；佢等就係𠊎在迦巴魯河壩滣所看到个生物。
16 基路伯行个時，輪仔在旁邊行；基路伯打開翼胛飛上去个時，輪仔也跈在佢等旁邊。
17 佢等停下來，輪仔也停下來。佢等飛上去，輪仔也跈在佢等旁邊，因為基路伯个靈在輪仔當中。
18 後來，上主个榮光離開聖殿个入口，徙到基路伯頂高。
19 𠊎看等个時，佢等打開翼胛飛上去；輪仔全部跈在佢等旁邊。佢等停在上主聖殿个東門，以色列上帝个榮光在佢等頂高。
20 𠊎認出這兜基路伯，係𠊎在迦巴魯河壩滣所看到个，就係在以色列上帝下背个生物。
21 逐個基路伯有四隻面，四隻翼胛；逐隻翼胛下有一隻像人个手。
22 佢等个面㧯𠊎在迦巴魯河壩滣所看到个完全共樣。逐個基路伯攏總係向頭前直行。