Bible

1 上主㧯𠊎講話； 2 佢講：「人子啊，你愛面向以色列該兜山，向它兜傳𠊎个信息。 3 愛喊以色列个山岡注意聽至高上主个話。𠊎—至高个上主對大山、細山、山排、山壢恁樣講：𠊎愛用刀劍毀壞人民在你等該位拜偶像个所在。 4 祭壇愛拆掉，香壇愛打爛。𠊎愛將該兜人全部在偶像面前㓾死。 5 𠊎愛使以色列人个屍體橫在偶像个面前，使佢等个骨頭散在祭壇个四圍。 6 以色列所有个城市會被人毀滅。恁樣，佢等全部个祭壇㧯偶像就會被人毀壞，香壇會被人打爛。佢等所製造个全部愛敲掉。 7 逐所在有人被人㓾死，賸到个人就會知𠊎係上主。 8 「有兜人𠊎愛俾佢脫離刀劍，四散到逐國， 9 過流亡个生活。在該位，佢等就會想到𠊎，正知𠊎个心樣般破碎，係因為佢等个心離開𠊎，對𠊎無忠心，歡喜偶像贏過敬愛𠊎。佢等會因為自家所做个壞事㧯邪惡个行為來怪怨自家。 10 佢等就會知𠊎係上主；𠊎警告愛使這災難臨到佢等个話毋係空空个。」 11 至高个上主恁樣講：「你愛拍手，蹬腳，為以色列人所做个邪惡㧯得人惱个事盡哀傷。佢等愛死在戰場、餓死、抑係病死。 12 去到遠方个人會發病來死；留在附近个人會死在戰場。賸下來个人會餓死。𠊎愛向佢等拚淨𠊎个大發譴。 13 佢等个屍體愛散在偶像當中，在祭壇四圍，在逐座大山、逐個山頂，在逐頭大樹㧯橡樹下背，在佢等向偶像獻過祭个所在。恁樣，佢等就會知𠊎係上主。 14 𠊎一定愛伸手消滅佢等个國家。𠊎愛使它荒廢，對南片个曠野一直到北片个第伯拉他城；以色列人住个所在無一位無荒廢。恁樣，佢等就會知𠊎係上主。」