Ezekiel 5
1 上主講：「人子啊，你愛拿一支利劍準剃頭刀，刮你个鬍鬚，剃你个頭那毛，將鬚㧯毛拿去用天平秤，然後分做三份。
2 城受包圍个日期滿以後，你愛拿三分之一个鬚㧯毛在城肚燒；拿另外三分之一到城外，緊行緊剁；又拿賸到个三分之一委在空中俾風吹散；𠊎還愛用𠊎个劍去逐。
3 你愛留一些仔鬚㧯毛，用衫角包等，
4 然後拿幾條鬚㧯毛出來，㧒到火肚燒。火愛對這幾條鬚㧯毛遰到以色列全國。」
5 至高个上主講：「這就係耶路撒冷！𠊎將它放在世界个中央，列國在它个四圍。
6 總係耶路撒冷違背𠊎个誡命，比列國還較壞，比四圍个國家還較悖逆。耶路撒冷毋遵守𠊎个誡命，廢掉𠊎个法律。
7 所以，耶路撒冷啊，你愛聽𠊎—至高个上主所講个話。你毋遵守𠊎个誡命，廢掉𠊎个法律，去跈列國个風俗習慣，為自家惹到个麻煩比鄰國還較多。
8 所以，𠊎—至高个上主宣佈，𠊎自家愛做你个對敵；𠊎愛在列國面前審判你。
9 因為你做个事全部係𠊎所怨恨个，所以𠊎愛責罰你。𠊎從來毋識恁樣責罰過你，以後也毋會再恁樣責罰你。
10 到最尾，在你个當中，爺𡟓愛食子女，子女愛食爺𡟓。𠊎愛責罰你，也愛將所賸个人全部逐到逐所在去。
11 「所以，𠊎—至高个上主指等𠊎永遠个生命發誓：你既然用一切可惡个偶像，又做𠊎所怨恨个事來污穢𠊎个聖殿，𠊎就愛使你人數減少，𠊎毋饒你，也毋憐憫你。
12 三分之一个人民愛在城肚病死、餓死；另外三分之一愛在城外被刀劍㓾死；𠊎愛將所賸个三分之一分散到四方，用𠊎个劍逐佢等。
13 「𠊎愛將所有个發譴拚在你个身項，拚到淨淨𠊎正滿足。恁樣，你就會知，𠊎—上主所講个話係出於嫉妒个心。
14 鄰國个人民經過該位，全部愛嘲謔你，遠遠離開你。
15 「𠊎發譴、大大責罰你个時，你四圍个國家全部會盡著驚。佢等看到這得人驚个情形就會恥笑你，嘲謔你，將你當做警戒。
16 𠊎愛切斷你个糧食，使你餓肚笥，俾你知肚笥枵个痛苦，就像當利个箭愛消滅你。
17 𠊎愛用飢荒㧯野獸消滅你个子女，又用發瘟、暴力㧯戰爭㓾你。𠊎—上主恁樣宣佈了。」