Ezekiel 21
1 上主㧯𠊎講話；
2 佢講：「人子啊，你愛面向耶路撒冷，指責該兜聖所，講預言警告以色列地。
3 𠊎—上主恁樣講：𠊎愛做你等个對敵；𠊎愛挷出劍來㓾你等，無論好人壞人全部愛㓾淨淨。
4 𠊎愛用𠊎个劍㓾人，對南到北攻擊一切个人。
5 所有个人就會知，𠊎—上主挷出劍，一定毋會收轉來。
6 「人子啊，你愛道嘆，像傷心失望个人；你愛在大眾面前道嘆。
7 佢等問你做麼介道嘆，你就㧯佢等講，你道嘆係因為聽到壞消息。一聽到該壞消息，佢等全部會心肝亂淨淨，兩手軟軟，膝頭愊愊掣，無半些勇氣。時間一到，災難就到！」至高个上主恁樣宣佈了。
8 上主㧯𠊎講：
9 「人子啊，你愛講預言，愛㧯人民講，𠊎—上主恁樣講：一支劍，一支當利皓光个劍，
10 磨利以後愛㓾人，拭金到會皓光像𥍉爧。𠊎个子民毋聽警告，毋驚責罰；佢等樣會有快樂呢！
11 劍已經拭到金金，做得用了；劍已經磨到利利，做得交給㓾人个人了。
12 人子啊，愛盡噭盡喊！這係為𠊎子民磨利个劍；這係為以色列个領袖拭金个劍。佢等㧯𠊎个子民會共下被人㓾死。你會絕望到捶心肝了。
13 考驗一定會來；若係猶大王該藐視个權杖無掉了，又樣般呢？」至高个上主恁樣宣佈了。
14 「所以，人子啊，你愛講預言。你愛拍手，這支劍就會緊刺人。這係一支㓾人个劍，會使人著驚个劍。
15 這支劍會使𠊎个子民失志，跌倒。𠊎愛用這皓光像𥍉爧、準備㓾人个劍來嚇佢等个城市。
16 當利个劍啊，由在你左片㓾右片㓾！想愛㓾㖠位，就向㖠位㓾過去。
17 𠊎也愛拍手，𠊎个大發譴就會煞掉。𠊎—上主恁樣宣佈了。」
18 上主㧯𠊎講話；佢講：
19 「人子啊，你愛畫出巴比倫王帶劍攻打个兩條路線；這兩條路全部愛用共隻國家做起點。你愛在這條路分岔个所在為王設立路標，
20 一條指向亞捫人个拉巴城，一條指向猶大，透到堅固个耶路撒冷城。
21 巴比倫王到分岔路口，企在路標頭前卜卦。佢用箭做籤來抽，求問佢个偶像，查看獻祭頭牲个肝。
22 佢正手抽到个箭寫等『耶路撒冷』。這係指示佢一定愛向耶路撒冷前進。佢愛裝備撞城个槌仔，用它攻打城門；愛起土堆，造高臺，大聲喊『㓾啊！』
23 耶路撒冷人會想這卜卦係騙人个，因為佢等識㧯巴比倫人立約。總係巴比倫王會使佢等記得自家所犯个罪，然後將佢等捉走。
24 這就係𠊎—至高个上主講个話：你等个罪過被人發現了。逐儕都知你等罪孽當重，所做所行全部顯出罪惡。你等一定愛受責罰；𠊎愛將你等交給敵人。
25 「你這積惡該死个以色列領袖啊，你个死日到了；你愛面對最尾个審判。
26 𠊎—至高个上主恁樣宣佈了：將你个冕旒㧯禮帽拿下來啊！一切變淨淨了。無權柄个人會高升，統治者會被人㩳下臺。
27 橫掉了，橫掉了，這城橫掉了。等到𠊎所選來責罰這城个人來到，這事正會發生。該時𠊎愛將這城交給佢。」
28 「人子啊，你愛講預言；你愛宣佈𠊎—至高个上主向侮辱以色列个亞捫人講个話。你愛㧯佢等講：㓾人个劍已經挷出來了；劍已經拭到金金，皓光像𥍉爧，愛㓾人了。
29 你等所看到个異象係虛假个；你等所講个預言係花撩。你等積惡該死，你等个死日到了。你等愛面對最尾个審判。劍愛架在你等个頸筋了。
30 「將劍收入刀鞘啊！𠊎愛在你等个故鄉—你等出世个所在審判你等。
31 𠊎當閼，愛將大發譴向你等拚到淨淨。𠊎愛將你等交給盡殘忍个人㓾。
32 你等愛被火燒淨淨。你等个血愛流在本國个土地上，無人會再想到你等。」上主恁樣宣佈了。