Ezekiel 20
1 𠊎等被人捉去个第七年五月初十，有兜以色列个長老來坐到𠊎面前，向𠊎問上主个旨意。
2 該時，上主㧯𠊎講話；
3 佢講：「人子啊，愛㧯以色列个長老講，至高个上主恁樣講：『你等來問𠊎个旨意係麼？𠊎指等𠊎永遠个生命發誓：毋準你等問。𠊎—至高个上主恁樣宣佈了。』
4 「人子啊，你有預備好愛宣告佢等个罪無？好去宣告了！俾佢等想到佢等个祖先所做該兜邪惡个事。
5 你愛㧯佢等講，𠊎—至高个上主恁樣講：𠊎揀選以色列—雅各个後代該時，識向佢等發誓；𠊎識在埃及向佢等顯明自家，發誓講：『𠊎係上主—你等个上帝。』
6 該時，𠊎應許佢等，愛𢱋佢等出埃及，帶佢等到𠊎為佢等所選該垤流乳㧯蜜當肥个土地，就係世界出產最豐富个土地。
7 𠊎命令佢等，逐儕愛㧒掉佢等所歡喜該兜邪惡个偶像，毋好拜埃及个假神來打垃圾自家，因為𠊎係上主—佢等个上帝。
8 總係佢等悖逆𠊎，毋聽𠊎講。佢等無豁掉該兜邪惡个偶像，也無㧒掉埃及个假神。該時，𠊎愛對佢等大發譴，在埃及向佢等拚𠊎个受氣。
9 總係𠊎無恁樣做。𠊎無愛𠊎个聖名變做壞名聲；因為𠊎識在佢等暫邸該所在个人民面前向以色列宣佈講，𠊎愛𢱋佢等出埃及。
10 「所以，𠊎𢱋佢等出埃及，帶佢等到曠野。
11 𠊎將𠊎个誡命賜給佢等，將𠊎个法律教導佢等，使遵行个人全部會有命。
12 𠊎也命令佢等愛守𠊎个安息日，做𠊎等立約个記號，好提醒佢等，係𠊎—上主使佢等成做神聖个子民。
13 總係以色列人在曠野就悖逆𠊎。佢等毋遵行𠊎个法律，豁掉𠊎个誡命—雖然遵行个人會有命。佢等徹底打垃圾𠊎个安息日。𠊎本來想愛在曠野將𠊎个大發譴向佢等拚到淨淨，將佢等消滅掉。
14 總係𠊎無恁樣做。𠊎無愛𠊎个聖名變做壞名聲，因為列國全部看到𠊎𢱋以色列人出埃及。
15 所以，𠊎在曠野發誓，𠊎毋𢱋佢等到𠊎愛賜給佢等該垤流乳㧯蜜个土地，就係世界出產最豐富个土地。
16 𠊎恁樣發誓；因為佢等豁掉𠊎个誡命，毋遵行𠊎个法律，打垃圾𠊎个安息日。佢等總係愛拜佢等个偶像。
17 「雖然恁樣，𠊎還係憐憫佢等，決定無愛在曠野消滅佢等。
18 𠊎在曠野警告佢等个後生人講：毋好守祖先所定个例規；毋好跈佢等个風俗；毋好拜偶像來打垃圾自家。
19 𠊎係上主—你等个上帝。你等愛遵從𠊎个法律、誡命，
20 守𠊎个安息日做神聖个日仔，做𠊎等立約个記號，好提醒你等，𠊎係上主—你等个上帝。
21 「總係，該代人也悖逆𠊎。佢等毋遵行𠊎个法律、誡命—雖然遵行个人會有命。佢等也打垃圾𠊎个安息日。𠊎本來想愛在曠野將𠊎个大發譴向佢等拚到淨淨，將佢等消滅掉，
22 總係𠊎無恁樣做。𠊎無愛𠊎个聖名變做壞名聲，因為列國全部看到𠊎𢱋以色列人出埃及。
23 所以，𠊎在曠野又發誓，愛將佢等分散到全世界。
24 𠊎恁樣做係因為佢等毋遵行𠊎个法律㧯誡命，打垃圾𠊎个安息日，拜佢等祖先拜過个偶像。
25 「後來，𠊎由在佢等行毋好个例規，守毋會給人有生命个誡命，
26 俾佢等用自家个祭物打垃圾自家，也俾佢等獻自家个長子做牲儀。這係愛刑罰佢等，使佢等知𠊎係上主。
27 「所以，人子啊，愛㧯以色列人講，𠊎—至高个上主恁樣講：你等个祖先對𠊎無忠心，再一擺侮辱𠊎。
28 𠊎帶領佢等到𠊎應許給佢等个土地。佢等一看到大山㧯盡靚个樹仔，就在該位獻祭。佢等所獻清香个牲儀㧯敬神个酒惹𠊎受氣。
29 𠊎責備佢等：你等去个該兜高地做麼介？對恁樣，該兜所在就一直安到『高地』。
30 所以，你愛轉告以色列人，𠊎—至高个上帝恁樣講：你等做麼介還係犯你等祖先犯過个罪、拜佢等拜過个偶像？
31 就算今晡日，你等還係獻佢等所獻个牲儀，將自家个孻仔當做牲儀燒給佢等所拜个偶像來打垃圾自家。你這兜以色列人還敢來求問𠊎个旨意！𠊎—至高个上主指等𠊎永遠个生命向你等發誓：毋准你等求問！
32 你等已經決定學列國，像外國人民恁樣拜樹頭㧯石頭。你等這種心意絕對毋會實現！
33 「𠊎—至高个上主指等𠊎永遠个生命向你等發誓：𠊎警告你等，𠊎愛用大權能个手、責罰个手、盡拚大發譴來統治你等。
34 𠊎將你等集合起來，對四散个各國𢱋轉來个時，𠊎愛喊你等體驗到𠊎大權能个手、責罰个手，㧯盡拚个大發譴。
35 𠊎愛將你等帶到『萬民个曠野』，在該位當面審判你等。
36 𠊎以前樣般在埃及个曠野責罰你等个祖先，這下𠊎愛照樣責罰你等。」至高个上主恁樣宣佈了。
37 「𠊎愛嚴格來管你等，使你等遵守𠊎个約。
38 𠊎愛對你等當中除掉悖逆㧯得罪𠊎个人。𠊎愛將佢等徙走，使佢等離開這下暫邸个所在；總係𠊎絕對毋會俾佢等轉到以色列故鄉。恁樣，你等就會知𠊎係上主。」
39 至高个上主恁樣講：「所有个以色列人啊，由在你等繼續拜你等个偶像啊！總係𠊎警告你等，以後，你等一定會服從𠊎，無再獻祭給偶像來侮辱𠊎个聖名。
40 你等所有以色列人愛在𠊎个聖山頂，就係以色列个高山，敬拜𠊎。𠊎會歡喜在該位接納你等，等等你等帶祭物、最好个祭品，㧯神聖个禮物來獻給𠊎。
41 𠊎愛𢱋你等離開被人捉去个所在，將你等對外國集合起來；𠊎愛接納你等像清香个牲儀；列國也會知𠊎係神聖个。
42 𠊎𢱋你等轉到以色列，到𠊎應許給你等祖先个土地以後，你等就會知𠊎係上主。
43 該時，你等會想到頭擺所做一切見笑个事，發現你等係樣般打垃圾自家。你等愛因為自家所做該兜壞事當惱自家。
44 𠊎用行動來維持𠊎个聖名時，你這兜以色列人就會知𠊎係上主，因為𠊎毋照你等个壞行為㧯敗壞來責罰你等。」至高个上主恁樣宣佈了。
45 上主㧯𠊎講話；
46 佢講：「人子啊，你向南看！面對南方个樹林講預言。
47 對南方个樹林講，愛聽至高个上主所講个話。看啊，𠊎愛放火！愛燒淨樹林肚个樹仔，無論係青个抑係燥个，全部燒光光。火當猛打毋烏，對南方一直燒到北方，逐儕个面會被大火㸐到。
48 佢等全部會知，該係𠊎—上主所放个火，無人能打烏。」
49 𠊎就講：「至高个上主啊，佢等會指等𠊎講：『佢敢毋係又在講比喻了！』」