1這個聲對𠊎講：「人子啊，企起來！𠊎愛㧯你講話。」
2這個聲對𠊎講話該時，上帝个靈入到𠊎底背，將𠊎扶起來。𠊎聽到這聲音繼續對𠊎講：
3「人子啊，𠊎愛派你到悖逆个國民以色列人該位去。佢等㧯佢等个祖先共樣悖逆𠊎，離開𠊎，到這下還係違背𠊎。
4佢等硬頸又硬殼，毋尊重𠊎，所以𠊎愛派你去，將𠊎—至高个上主愛㧯佢等講个話對佢等講。
5無論該兜悖逆个人愛聽抑毋聽，佢等應該知有一個先知在佢等當中。
6「總係，人子啊，你毋使驚佢等，也毋使驚佢等講个話。佢等會反抗你，看毋起你，就像竻仔㧯蒺藜刺你，害你像住在蠍仔當中。佢等係悖逆个人，總係你毋使驚佢等講个話，也毋使被佢等个面色嚇倒。
7無論佢等愛聽抑毋聽，你愛將𠊎个話㧯佢等講。愛知佢等係悖逆个人。
8「人子啊，你愛注意聽𠊎㧯你講个話；做毋得像佢等恁樣悖逆。你个嘴打開來，將𠊎愛給你个東西食落去。」
9然後𠊎看到有一隻手向𠊎伸過來，手項拿等書卷。
10佢打開該書卷；𠊎看到書卷个正反兩面全部寫等字，頂高所寫个係哀傷、歎息㧯痛心个話。