Ezekiel 1
1 第三十年四月初五，𠊎㧯被人捉去个猶大人住在巴比倫个迦巴魯河壩滣。該時天打開來，𠊎看到上帝个異象。
2 (這件事發生在約雅斤王被人捉去个第五年。)
3 𠊎—布西个孻仔，祭司以西結—在巴比倫个迦巴魯河壩滣聽到上主㧯𠊎講話，又感覺到上主个能力充滿𠊎。
4 𠊎一看，看到狂風對北方吹來；有𥍉爧對一大堆雲出來，雲个四圍非常光，在𥍉爧當中就像有發光个純金。
5 𠊎看到狂風中央有四個生物；佢等看起來像係人，
6 總係逐個生物有四隻面，四隻翼胛。
7 佢等个腳直直，腳盤像牛蹄，全部像拭到金金个銅恁樣皓光。
8 逐個生物有四隻面、四隻翼胛以外，逐隻翼胛下還有一隻人个手。
9 逐個生物向外伸出兩隻翼胛，㧯隔壁生物个翼胛接等，成做四角形；四個共下徙挺動，毋使轉身。
10 四個生物攏總有四隻面：頭前像人个面，右片像獅仔个面，左片像牛个面，後背像鷹鳥个面。
11 佢等个翼胛一對在頂高打開來飛，㧯隔壁生物个翼胛接等，一對在下背遮等自家个身體。
12 逐個生物个面向等四方；靈向㖠位行，佢等就向㖠位行，毋使轉身。
13 四個生物个當中像有𤏸等个火炭，像火把恁樣徙來徙去；火把噴出火，發出電光。
14 生物飛來飛去，像𥍉爧恁遽。
15 𠊎看等生物个時，看到逐個生物个塍頭各有一隻輪仔貼等地面。
16 四隻輪仔个外形㧯做法全部共樣，像寶石恁樣皓光。逐隻輪仔落等另外一隻輪仔，直角相切；
17 恁樣，四隻輪仔做得向所有个方向挺動，毋使轉向。
18 輪框高到得人驚，四隻輪框有盡多目珠。
19 四個生物徙挺動，四隻輪仔跈等挺動；生物離開地面，輪仔跈等離開地面。
20 靈到㖠位，生物就到㖠位；生物上到㖠位，輪仔也共樣上到㖠位，因為生物个靈在輪仔當中。
21 所以，逐擺生物徙挺動、停止、抑係離開地面，輪仔就跈等挺動、停止、抑係離開地面，因為生物个靈在輪仔當中。
22 四個生物頭那頂有穹蒼个形狀，像刺目个水晶恁光。
23 在穹蒼下背企等這四個生物；佢等伸出一對翼胛，㧯隔壁个翼胛接等，又用另外一對翼胛遮蓋自家个身體。
24 𠊎聽到佢等飛个時翼胛所發出个聲；就像大水个聲音，也像大軍在大聲嘶，又像全能上帝个聲音。佢等停下來个時就將翼胛收起來，
25 總係還有聲對佢等頭那頂个穹蒼頂高傳來。
26 穹蒼个頂高有一座像係用藍寶石造个寶座；頂高坐等个當像係人。
27 𠊎看到佢个腰圈以上就像係發光个純金，內外全部像火；佢个腰圈下背像火，四圍全部發光。
28 這光彩㧯落雨天雲中个虹共樣。這就係顯明上主臨到个榮光。𠊎一看到這光景就伏落在地上。接等，𠊎又聽到一個講話个聲。