Bible

1 以色列所有个人民遵照上主个指示離開汛个曠野，一位一位遷徙等去。佢等到利非訂安營，總係該位無水好食； 2 所以人民㧯摩西計較講：「給𠊎等水食！」摩西應講：「你等做麼介怪𠊎？做麼介愛試探上主？」 3 總係人民非常嘴燥，就對摩西發怨言。佢等講：「你做麼介將𠊎等𢱋出埃及？你愛俾𠊎等㧯𠊎等个子女、連𠊎等个頭牲全部渴死係麼？」 4 摩西迫切在上主面前祈禱講：「𠊎愛樣般應付這兜人民正好呢？佢等強強會拿石頭將𠊎㧹死。」 5 上主對摩西講：「你帶幾個以色列人个長老㧯你共下行到人民頭前，手愛拿等你打尼羅河壩水个柺棍仔。 6 𠊎愛在何烈山个一垤磐石頂企在你面前。你打該磐石，就會有水流出來給人民食。」摩西就在以色列長老个面前恁樣做。 7 佢將該地方安到瑪撒，又安到米利巴；因為以色列人在該位怪怨、試探上主。佢等問：「上主敢有㧯𠊎等共下？」 8 亞瑪力人到利非訂攻打以色列人。 9 摩西對約書亞講：「你去選兜人出來，準備㧯亞瑪力人相㓾。天光日𠊎愛企在山頂，手拿等上帝个柺棍仔。」 10 約書亞照摩西所吩咐个，出去㧯亞瑪力人相㓾；摩西、亞倫㧯戶珥上到山頂。 11 摩西手擎起來个時，以色列人就贏；佢手放下來，亞瑪力人就贏。 12 摩西个手𤸁了，亞倫㧯戶珥搬一垤石頭來，俾佢坐在頂高；一個企左片，一個企右片，扶等佢个手，直到日頭落山。 13 恁樣，約書亞就用刀劍贏過亞瑪力王㧯佢帶來个人。 14 所以，上主對摩西講：「將這擺个勝利記錄下來，好講給後代聽。又愛㧯約書亞講，𠊎愛完全拭掉亞瑪力人个名號。」 15 摩西起一座祭壇，安名做「上主係𠊎个軍旗」。 16 佢講：「手擎上主个軍旗！上主愛世世代代㧯亞瑪力人相㓾。」