Exodus 16
1 以色列所有个人民離開以琳。在離開埃及後第二隻月个十五，佢等來到以琳㧯西奈中間汛个曠野。
2 在曠野中，以色列所有个人民埋怨摩西㧯亞倫，
3 對佢等講：「𠊎等在埃及就死在上主个手中還較贏！在埃及，𠊎等至少還有可能圍等鑊仔食肉，也有其他食物好食到飽飽；總係你等將𠊎等帶到這曠野來，害𠊎等在這位餓死。」
4 上主對摩西講：「𠊎愛對天頂降下糧食。人民逐日一定愛出去拈該日所需要个糧食。𠊎恁樣做，係愛試驗佢等，看佢等會遵守𠊎个指示麼。
5 到第六日，佢等一定愛加拈一日份來做準備，就係愛拈兩日个糧食。」
6 摩西㧯亞倫對以色列人講：「今暗晡，你等就會知𢱋你等出埃及个就係上主。
7 天光朝晨，你等會看到上主个榮光。佢已經聽到你等个埋怨了；𠊎等算麼介，你等个埋怨其實係對上主發个。」
8 摩西又講：「上主暗晡頭愛給你等有肉好食，朝晨頭愛給你等有罅額个食物，因為佢已經聽到你等對佢个怨言。你等怪怨𠊎等，其實就係怪怨上主！」
9 摩西對亞倫講：「去喊以色列人民攏總來企在上主面前，因為佢已經聽到佢等个怨言。」
10 在亞倫對以色列所有个人民講話个時，佢等向曠野看，忽然看到上主个榮光顯現在雲个中間。
11 上主對摩西講：
12 「𠊎已經聽到以色列人个怨言。你愛㧯佢等講：『在臨暗仔，你等會有肉好食；在朝晨頭，你等會有食物好食飽。恁樣，你等就會知𠊎係上主，係你等个上帝。』」
13 臨暗仔，一大群鵪鶉飛來，多到將全營攏總遮掉。天一光，營个四圍全部係露水；
14 露水一燥掉，在曠野个地面上有一層薄薄像霜个東西。
15 以色列人看到這東西，毋知係麼介，就問來問去講：「這係麼介東西？」摩西對佢等講：「這就係上主給你等个食物。
16 上主識吩咐：逐儕愛照自家个食量來拈，照帳篷肚个人數，逐儕做得拈兩公升。」
17 以色列人照吩咐去做，有兜人拈較多，有兜人拈較少。
18 照升斗量个時，拈較多个無好賸，拈較少个也無欠；逐個人所拈个堵好係佢所需要个。
19 摩西對佢等講：「做毋得有人將食物留到第二朝晨。」
20 總係有兜人毋聽摩西个話，留兜下來。到第二朝晨，這兜留下來个全部發蟲、臭掉。摩西對佢等發譴。
21 逐日朝晨，逐儕全部出去拈自家所需要个食量；日頭發出熱氣个時，食物就溶掉。
22 到第六日，佢等拈雙倍个食物，逐儕四公升。民間所有个領袖來對摩西報告這件事。
23 摩西對佢等講：「上主已經吩咐過，天光日係安息聖日，應該獻給上主。今晡日你等愛照平常恁樣焙、恁樣煮；賸到个留到第二朝晨正來食。」
24 佢等照摩西个吩咐，將賸到个食物留到第二朝晨；這兜食物無發蟲，也無臭掉。
25 摩西講：「你等就食留下來个食物！因為今晡日係獻給上主个安息日；今晡日你等在營外尋毋到一些仔食物。
26 你等愛在六日內拈食物，總係第七日係安息日，一定尋毋到。」
27 到第七日，有兜人還係出去尋食物，總係一些仔也尋毋到。
28 上主對摩西講：「你等毋遵守𠊎个命令㧯法律，愛到幾時呢？
29 愛記得，𠊎係上主；安息日係𠊎給你等歇睏个；所以𠊎在第六日給你等兩日个食物；到第七日，逐儕一定愛留在屋下，做毋得出去。」
30 所以以色列人在第七日歇睏。
31 以色列人將這食物安到嗎哪。它像芫荽仔，係白色个，食起來像用蜂糖做个餅。
32 摩西講：「上主命令𠊎等留下兩公升足足个嗎哪給𠊎等个子孫，好俾佢等看上主對埃及𢱋𠊎等出來个時、在曠野所賜給𠊎等个食物。」
33 摩西對亞倫講：「拿一隻罐仔，裝兩公升嗎哪在罐仔底背，放在上主面前；這係為𠊎等个子孫留下來个。」
34 上主樣般吩咐摩西，亞倫就照恁樣做。佢將罐仔放在約櫃頭前，保存起來。
35 以色列人食嗎哪一共四十年，直到佢等到迦南定居下來。
36 (當時標準量器个單位係二十公升。)