1後來，亞哈隨魯王个發譴過掉，就盡思念華實蒂，總係又想到姖反抗命令㧯受處罰个事。
2王親信个顧問對王建議講：「樣般毋尋兜後生又靚个童女來呢？
3請王在全國逐省指派官員，喊佢等將所有靚个細妹仔帶到首都書珊个後宮來，交給總管宮女个太監希該，供給姖等化粧品。
4以後，王做得選盡合意个細妹仔，立做王后，來代華實蒂。」王歡喜這建議，就照恁樣去做。
5在書珊，有一個猶太人安到末底改。佢屬便雅憫支族，係基士㧯示每个後代，睚珥个孻仔。
6當巴比倫王尼布甲尼撒對耶路撒冷將猶大王耶哥尼雅捉走个時，也捉走一群人，末底改个祖先也在當中。
7末底改有一個叔伯老妹安到以斯帖，希伯來名安到哈大沙；姖係一個盡靚个細妹仔，又有真好个身材。厥爺𡟓死後，末底改收養姖做自家个妹仔，將姖𢱋大。
8王个新命令頒佈以後，盡多當靚个細妹仔被人帶到首都書珊來；以斯帖也被人帶入王宮，交給管後宮个太監希該。
9希該當惜以斯帖，款待姖特別好，黏時供給姖化粧品㧯特別个食物，又對王宮選出七個宮女來服事姖，又給姖後宮最好个房間。
10以斯帖聽從末底改个指示，無將自家个種族㧯親戚講給人知。
11末底改逐日在後宮个庭院前行來行去，愛知以斯帖个情形，事情會有麼介發展。
12照規定，該兜細妹仔愛經過一年个美容保養正做得見王：前六隻月用沒藥油，後六隻月用香膏㧯化粧品美容。經過這段時間以後，逐個細妹仔就會輪流被人帶去見亞哈隨魯王。
13細妹仔對後宮入去王宮个時，做得照自家个意思打扮，姖所需要个，全部給姖。
14姖愛在王宮歇一暗晡，第二朝晨就被人帶到另外一個後宮去，交給管嬪妃个太監沙甲照顧；若毋係王特別中意姖，指名喊姖，姖就無機會再轉到王該位去。
15以斯帖見王个日期到了。姖係亞比亥个妹仔、末底改个叔伯老妹，後來做末底改个養女。看過以斯帖个人全部感覺姖當得人惜。輪到姖見王个時間，除了照總管內宮个太監希該所建議个打扮以外，無特別要求麼介。
16亞哈隨魯做王个第七年十月，就係提別月，以斯帖被人帶入王宮。
17王中意以斯帖贏過其他所有个婦女；姖比其他个童女得到王較多个痛惜。對恁樣，王將王后个冕旒戴在姖个頭那頂，立姖做王后，來代華實蒂。
18接等，王為以斯帖辦大筵席，邀請所有个貴族㧯行政官員前來參加。該日，佢宣佈全國逐省休假，又當慨送出當多禮物。
19王第二擺召集童女个時，末底改已經在王宮得到一個職位。
20以斯帖聽末底改个吩咐，對頭到尾無將自家个種族㧯親戚講給人知。以斯帖聽從末底改，就像末底改養育姖个時一樣。
21末底改在王宮做官个期間，有兩個看守宮門个太監—辟探㧯提列非常惱亞哈隨魯王，想愛暗殺佢。
22末底改發現這陰謀，就㧯王后以斯帖講。以斯帖就用末底改个名義㧯王講。
23這件事經過調查係事實；這兩個人就被人吊死在絞刑架頂。王命令將這件事記錄在官方个歷史底背。