Deuteronomy 8
1 「今晡日𠊎頒佈給你等所有个法律，你等一定愛確實遵行，使你等生存下去，人口增多，又入去得到上主應許給你等祖先該垤土地。
2 你等愛回想，在曠野流浪這四十年間，上主—你等个上帝樣般帶領你等个路程。佢用困難考驗你等，使你等謙卑，想愛知你等个心志，看你等係毋係肯遵行佢个誡命。
3 上主使你等餓肚笥，使你等謙卑，然後將嗎哪—係你等㧯你等个祖先全部毋知係麼介食物賜給你等，用這來教你等，人个生存毋係單淨靠食物，愛靠上主所講个逐句話。
4 這四十年來，你等个衫褲無著爛，腳也無行腫。
5 你等愛愐想，上主—你等个上帝管教你等，就像阿爸管教佢个子女。
6 所以，你等愛謹守上主—你等上帝个誡命，遵行佢个道，敬畏佢。
7 上主—你等个上帝愛帶領你等到盡靚个土地去；該位有河壩、泉水㧯地下水好滋潤山壢㧯山排；
8 該地出產大麥、小麥、葡萄、無花果、石榴、橄欖㧯蜂糖。
9 在該地，你等毋會再餓肚笥，毋會欠麼介。該地个石頭有豐富个鐵質，山肚有銅礦。
10 你等會有好食到飽飽，也愛感謝上主—你等个上帝，因為佢將盡靚个土地賜給你等。」
11 「你等愛細膩，做毋得毋記得上主—你等个上帝；做毋得毋遵守佢所有个誡命、法律㧯例規，就係𠊎今晡日所吩咐你等个。
12 當你等食到飽足、起靚靚个屋仔住，
13 你等个牛羊、金銀㧯其他財產全部增加个時，
14 愛細膩！做毋得驕傲到毋記得上主—你等个上帝。佢識救你等離開做奴才个埃及地，
15 𢱋你等經過該當闊、荒涼、毒蛇㧯毒蟲盡多个曠野。在該燥燥無水个所在，佢使當硬个磐石流出泉水，俾你等毋會嘴燥。
16 在曠野，佢將嗎哪，係你等㧯祖先毋知个食物賜給你等。佢先用困難考驗你等，使你等謙卑，然後賜給你等美好个東西。
17 所以，毋好恅到你等係靠自家个雙手㧯能力成做好額。
18 你等愛記得，係上主—你等个上帝賜給你等力量，使你等好額个。佢恁樣好款待你等，因為到今晡日佢還係守佢㧯你等祖先所立个約。
19 你等做毋得毋記得上主—你等个上帝，做毋得轉向別个神明，跪拜、服事它兜。𠊎今晡日警告你等，若係你等離開上主，一定會消滅。
20 若係你等毋順從上主—你等个上帝，一定會滅亡，就像佢愛在你等前進个時消滅該兜民族共樣。」