Deuteronomy 7
1 「上主—你等个上帝愛𢱋你等進入你等愛去佔領个土地；佢愛逐出盡多民族。你等前進个時，佢愛逐走七個比你等強大个民族：就係赫人、革迦撒人、亞摩利人、迦南人、比利洗人、希未人、耶布斯人。
2 上主—你等个上帝愛將這兜民族交給你等。你等愛打贏佢等，徹底消滅佢等，做毋得憐憫佢等，抑係㧯佢等立約。
3 你等做毋得㧯佢等通婚；你等个妹仔做毋得嫁給佢等个孻仔，孻仔做毋得討佢等个妹仔；
4 因為佢等會引誘你等離開上主，去拜別个神明。若係你等離開上主，佢會向你等發譴，黏時消滅你等。
5 所以，你等愛拆掉佢等个祭壇，打碎佢等个神柱，斬橫亞舍拉女神像，燒掉佢等个偶像。
6 你等係屬上主—你等个上帝个；你等係聖潔个子民。上主—你等个上帝對天下萬民中揀選你等做佢自家寶貝个子民。
7 「上主惜你等，揀選你等，並毋係因為你等个人數比別人較多；其實，你等係世界上最細个民族。
8 上主惜你等，係為到愛守佢向你等祖先所應許个。恁樣，上主就用大能力救你等，對做奴才个所在將你等救出來，使你等脫離埃及王个手。
9 所以，你等愛知：上主—你等个上帝係惟一个上帝。所有敬愛佢、遵行佢誡命个人，佢係信實个、定著會守約，用不變个慈愛對待佢等，直到千代。
10 總係惱佢个人，佢會當面責罰佢等、盡遽消滅佢等。
11 所以，你等一定愛確實遵行𠊎今晡日向你等頒佈个所有誡命、法律㧯例規。」
12 「你等若係聽從這兜誡命，確實遵行，上主—你等个上帝會照佢向你等祖先所應許个，守佢㧯你等所立个約，用不變个慈愛款待你等。
13 佢定著會惜你等，賜福給你等，使你等興旺，在佢應許你等祖先愛賜給你等个土地上賜福給你等，使你等多子多孫，生產豐富—有五榖、酒、橄欖油㧯當大群个牛羊。
14 你等領受个福氣會贏過世上萬族所領受个。無論你等抑係你等个牛羊全部無毋會𫱔个。
15 上主會使你等無災無病，毋會再俾你等遰到在埃及發過該兜得人驚个病痛；佢會將該兜得人驚个病痛加在你等敵人个身上。
16 上主—你等个上帝交在你等手中个各民族，你等一定愛消滅，毋好憐憫佢等。你等做毋得拜佢等个神明，因為該會成做害死你等个羅網。
17 「你等毋好恅到這兜民族比你等較多，就無法度逐走佢等。
18 毋使驚佢等！你等定著愛記得上主—你等个上帝樣般對付埃及王㧯佢所有个人民。
19 你等親目看過該兜得人驚个災難、神蹟、奇事。愛記得，上主—你等个上帝用大能大力救你等出來。上主—你等个上帝樣般消滅埃及人，也愛照樣消滅你等所驚个該兜民族。
20 上主—你等个上帝愛使佢等著驚混亂；就算有兜逃走、囥起來，也會全部被佢消滅。
21 所以，你等毋使驚這兜人，因為上主—你等个上帝㧯你等同在。佢係至大、應該受敬畏个上帝。
22 你等前進个時，上主—你等个上帝會漸漸將這兜民族逐走。你等做毋得一下仔就將佢等全部消滅，驚怕恁樣做，會使野獸增多，反轉傷害到你等。
23 上主—你等个上帝會將敵人交在你等个手中，使佢等大著驚，直到佢等全部消滅。
24 佢也會將佢等个君王交在你等手中；你等愛㓾掉佢等，使人毋會再想起佢等个名。你等㓾佢等个時，無人能抵抗。
25 你等愛燒掉佢等个偶像；做毋得貪偶像身上个金銀，也做毋得偷偷仔留起來，驚怕恁樣做會陷害你等跌落羅網，因為上主—你等个上帝盡惱偶像。
26 連一個偶像都做毋得帶轉屋下，免得你等受到這兜偶像所受个咒詛。你等一定愛盡惱、盡恨這兜偶像；因為它兜係上主所咒詛个。」