Deuteronomy 24
1 「若係有人討𡜵娘後發現姖有見笑个行為就毋惜姖，寫離婚書給姖，喊姖離開；
2 若係這個𡜵娘離開後，去㧯別人結婚，
3 第二個老公也毋惜姖，寫離婚書給姖，喊姖離開；抑係這個老公死掉；
4 無論在㖠種情形之下，姖个前夫做毋得再㧯姖結婚。因為對姖个前夫來講，姖已經被人打垃圾了。若係前夫再㧯姖結婚，就係冒犯上主。你等一定做毋得在上主—你等个上帝愛賜給你等个土地上犯佢所盡惱个罪。」
5 「做毋得喊正結婚个人做兵，也做毋得喊佢擔任公職；愛俾佢有一年个假期，留在屋下，給𡜵娘快樂。
6 「做毋得拿人个磨石抑係上𣎴做抵押，因為恁樣會害佢無辦法生活。
7 「若係有人綁架以色列同胞，強迫佢做奴僕，抑係將佢賣做奴才，該綁架人个就一定愛處死。你等愛對你等當中除掉這種壞事。
8 「你等若係發傳染性个皮膚病，一定愛照利未祭司所指教你等个認真去做；你等愛照𠊎命令佢等个，確實遵行。
9 愛記得，你等離開埃及後，上主—你等个上帝識在路途中樣般對待美莉安。
10 「你等無論借給人麼介，做毋得入佢屋下，自家擇愛做抵押个東西；
11 愛在外背，等佢親自將抵押品拿出來交給你等。
12 佢若係窮人，又拿外衫交給你等，你等做毋得將這抵押品留到第二日；
13 愛在該日、日頭落山个時，將外衫還給佢，俾佢做得拿來做被蓋等睡目。恁樣，佢會感激你等；上主—你等个上帝也會看這公義个事，來對你等歡喜。
14 「困苦、貧窮个工人，無論係以色列同胞抑係暫時住在你等城肚个外族人，你等全部做毋得欺負佢。
15 愛在日頭落山以前付給佢該日个工錢，因為佢需要錢；佢靠工錢維持生活。你等若係毋付給佢，佢向上主控告，你等就有罪了。
16 「爺𡟓無應該因為子女所犯个罪來處死；子女也無應該因為爺𡟓所犯个罪來處死。逐儕應當擔當自家所犯个罪。
17 「做毋得侵犯外族人抑係孤兒个權利；也做毋得拿寡婦个衫褲做抵押。
18 愛記得，你等在埃及做過奴才。上主—你等个上帝救贖你等離開該位，所以𠊎命令你等愛遵行這誡命。
19 「你等收成个時，漏掉無帶轉屋下个五榖，做毋得倒轉去拿；愛留在田肚，俾外族人、孤兒㧯寡婦去拈。恁樣，上主—你等个上帝會凡事賜福給你等。
20 你等打橄欖，打一輪以後，做毋得倒轉去打無打到个；愛將賸到个留給外族人、孤兒㧯寡婦。
21 你等摘葡萄，摘一輪以後，做毋得倒轉去摘無摘到个；愛將賸到个留給外族人、孤兒㧯寡婦。
22 愛記得，你等在埃及做過奴才，所以𠊎命令你等愛遵行這誡命。」