Deuteronomy 23
1 「卵受傷抑係閹掉个人做毋得加入敬拜上主个聚會。
2 「私生子做毋得加入敬拜上主个聚會；佢个子孫，甚至到第十代，也做毋得加入敬拜上主个聚會。
3 「亞捫人抑係摩押人做毋得加入敬拜上主个聚會。佢等个子孫，甚至到第十代，也做毋得加入敬拜上主个聚會。
4 因為你等出埃及个時，佢等無供給你等路途上所需要个糧食㧯水，佢等又對美索不達米亞个比奪城請比珥个孻仔巴蘭來咒詛你等。
5 總係上主—你等个上帝毋肯聽巴蘭个話，反轉將咒詛轉做祝福，因為上主—你等个上帝惜你等。
6 你等一生人絕對做毋得為佢等求平安、求繁榮。
7 「你等做毋得藐視以東人，因為佢等係你等个親族。你等做毋得藐視埃及人，因為你等識暫時住在佢等个土地上。
8 這兜人个第三代子孫做得加入敬拜上主个聚會。」
9 「你等在戰地安營个時，愛離開所有使你等在禮儀上無淨浰个事。
10 若係有人在暗晡時因為漏精變做無淨浰，佢就愛離開軍營，留在營外。
11 臨暗仔佢一定愛洗身，到日頭落山正做得轉營房。
12 「你等愛在軍營外指定一個所在做便所。
13 在你等个裝備中愛帶一支細鏟仔，屙屎个時拿來挖窟仔，然後將所屙个埋掉。
14 你等个軍營一定愛保持禮儀上个淨浰；因為上主—你等个上帝㧯你等共下在營肚，保護你等，使你等打贏敵人。你等做毋得做無淨浰个事，免得上主離開你等。」
15 「若係有奴僕逃走離開主人，要求你等个保護，你等做毋得將佢送轉佢主人該位。
16 佢做得自由在你等當中選愛住个城；你等做毋得欺負佢。
17 「以色列个男女做毋得在神廟做牛郎抑係妓女。
18 做牛郎抑係妓女得到个錢做毋得拿到上主—你等上帝个聖殿還願；因為上主—你等个上帝盡惱人去做神廟个男娼㧯妓女。
19 「你等借錢、糧食，抑係其他个東西給以色列同胞，做毋得算利息。
20 借給外族人做得算利息，借給以色列同胞就做毋得。你等遵守這規定，上主—你等个上帝就會在你等愛入去佔領該垤土地上凡事賜福給你等。
21 「你等向上主—你等个上帝許願，做毋得緊延纏毋還；因為上主一定會討你等所起个願。毋還願就係犯罪。
24 「你等經過鄰舍个葡萄園，做得隨意食園中个葡萄，總係做毋得拿麼介東西將葡萄裝起來帶走。
25 你等經過鄰舍个麥田，做得用手捋麥串來食，總係做毋得用鐮仔去收割。」