1大衛正過山頂，忽然看到米非波設个僕人洗巴牽等兩隻驢仔，驢背頂載等兩百隻餅，一百串葡萄乾，一百隻熱天个水果㧯一皮袋酒來迎接佢。
2大衛王問洗巴：「你帶這兜東西來做麼介呢？」洗巴講：「驢仔係給國王屋下个人騎个；餅㧯熱天个水果係給跈你个人食个；酒係給佢等在曠野𤸁个時啉个。」
3王問佢：「若主人掃羅个孫仔米非波設在㖠位？」洗巴應講：「佢留在耶路撒冷，因為佢相信以色列人這下一定會將厥公掃羅个王國還給佢。」
4王對洗巴講：「屬米非波設所有个財產這下全部歸給你了！」洗巴應講：「吾主吾王，𠊎跪下感謝你个大恩。願𠊎在你面前永遠得到照顧！」
5大衛王到巴戶琳个時，掃羅个一個親屬—基拉个孻仔示每出來見大衛；佢緊行緊咒罵大衛。
6示每毋驚大衛有身邊个勇士㧯侍衛个保護，拿石頭㧹大衛王㧯佢个官員。
7示每咒罵大衛講：「出去！你這流人血个兇手出去！
8你搶掃羅个王國，這下上主愛因為你㓾掃羅个家族責罰你。上主已經將這王國交給若孻仔押沙龍了。你這兇手，你害到自家了！」
9洗璐雅个孻仔亞比篩對王講：「吾主吾王，做麼介俾這條死狗咒罵你呢？俾𠊎過去剁下佢个頭來！」
10王對亞比篩㧯厥哥約押講：「洗璐雅个孻仔啊，這㧯你等無關係！若係佢咒罵𠊎，係因為上主愛佢恁樣做，麼人有權利問佢，做麼介愛恁樣做呢？」
11大衛又對亞比篩㧯所有个官員講：「連𠊎自家个孻仔也愛㓾𠊎，這便雅憫人个行為有麼介好奇怪？這係上主愛佢咒罵个；由在佢去罵！
12因為𠊎今晡日被人咒罵，可能上主會顧念𠊎个苦難，施恩賜福給𠊎。」
13所以大衛㧯跈佢个人繼續向前行。示每在大衛對面个山崎頂緊行緊咒罵，又拿石頭㧯泥團㧹佢。
14王㧯所有跈佢个人到約旦河个時感覺盡𤸁，就在該位歇睏。
15押沙龍㧯跈佢个以色列人進入耶路撒冷；亞希多弗也㧯佢共下。
16大衛个朋友亞基人戶篩去迎接押沙龍，喊等講：「國王萬歲！國王萬歲！」
17押沙龍問戶篩：「你對你个朋友大衛个忠誠㖠位去了？你樣般無跈佢走呢？」
18戶篩應講：「𠊎樣般做得走呢？𠊎愛盡忠个係該被上主、這兜人㧯所有以色列人揀選出來个人，所以𠊎係屬佢个，𠊎愛㧯佢共下。
19過講，𠊎毋服事𠊎主人个孻仔還愛服事麼人呢？𠊎樣般服事若爸，這下𠊎愛照樣服事你。」
20押沙龍轉身對亞希多弗講：「你有麼介建議？𠊎等應該樣般做？」
21亞希多弗對押沙龍講：「你去㧯若爸留下來、該兜看守王宮个細姐共下睡。恁樣，每一個以色列人會聽到你變成若爸个仇敵；跈你个人就會大大堅強起來。」
22所以佢等在王宮樓頂搭一座布篷給押沙龍。眾人目金金看押沙龍入布篷，㧯厥爸該兜細姐共下睡。
23在該時代，亞希多弗無論係為大衛抑係為押沙龍所出个主意，全部像係對上帝來个話。