1這事以後，押沙龍為自家預備一輛戰車㧯盡多馬仔，又派五十個衛兵在佢頭前開路。
2佢常常打早䟘起來就到城門口个路堘企等，堵到人有紛爭个事愛來求王解決，押沙龍就會喊佢過來，問佢對㖠來。當該儕人講明係屬以色列㖠個支族以後，
3押沙龍就會講：「你看，你个事有情有理；可惜王無派人來聽你个案件。」
4然後佢還會加上一句：「當希望𠊎做一個法官！有人堵到紛爭抑係請求，做得到𠊎這位來，𠊎一定會給佢公平个審判。」
5若係有人行近押沙龍，愛拜佢，押沙龍就會伸手扶等佢、唚佢。
6押沙龍向逐個到王該位求審判个以色列人全部恁樣做，所以押沙龍就私下得到以色列人个心。
7四年後，押沙龍對大衛王講：「請准𠊎到希伯崙去，還𠊎向上主許个願！
8若僕人還住在敘利亞个基述時，𠊎識向上主許願講，若係佢帶𠊎轉耶路撒冷，𠊎就會在希伯崙敬拜佢。」
9王講：「做你安心去啊！」押沙龍就到希伯崙去了。
10總係佢暗中派使者到以色列逐支族去，講：「當你等聽到羊角響个時，就喊講：『押沙龍在希伯崙做王了！』」
11押沙龍對耶路撒冷請兩百個人，㧯佢共下去；佢等一些仔乜毋知內情，全部係單純跈等去个。
12押沙龍獻祭个時，佢同時派人請基羅城个亞希多弗來；這個人係大衛王个參謀。所以悖逆个勢力越來越大，跈等押沙龍个人也越來越多。
13有使者向大衛報告講：「以色列人个心全部歸向押沙龍了。」
14大衛就對該兜跈佢在耶路撒冷个官員講：「若係𠊎等想愛閃押沙龍，就愛黏時離開這位，若無就會來毋掣了。遽遽走！驚怕佢忽然間來到，會傷害𠊎等，㓾死全城个人！」
15王个官員應講：「吾主吾王，僕人全部準備心，愛照你所決定个去做！」
16所以王帶等全家人離開，只留下十個細姐看守王宮。
17王㧯所有跈等佢个人民離開耶路撒冷，到城最尾項一間屋就停下來。
18王个官員全部在佢面前經過；該兜做侍衛个基利提人㧯比利提人，並該六百個對迦特來跈佢个人也全部在佢面前經過。
19王對迦特人个領袖以太講：「你做麼介跈𠊎等共下走呢？轉去留在新王該位！因為你係外國人，係遠離自家个國家避難个。
20你在這位个時間當短，𠊎樣做得俾你㧯𠊎等共下流浪？連𠊎自家乜毋知愛到㖠位去。轉去啊！帶等你个同胞共下走！願上主用慈愛信實款待你！」
21以太應講：「吾主吾王，𠊎指等永生个上主向你發誓，無論吾主吾王到麼介地方，僕人愛跈你，係生係死，𠊎也願意。」
22大衛對以太講：「當好，繼續向前出發。」恁樣迦特人以太帶等佢个軍隊㧯佢等个家眷全部行過去。
23大衛㧯跈佢个人離開个時，本地个人民全部開聲大噭。王過汲淪溪，佢个部下也跈等過去；佢等共下向曠野去。
24該時，祭司撒督也來了；扛上帝約櫃个利未人也㧯佢共下在該位。佢等將上帝个約櫃放下來，等所有人民離城後再扛起來。祭司亞比亞他也在該位。
25王對撒督講：「將上帝个約櫃扛轉城肚去！若係上主歡喜𠊎，有一日佢會俾𠊎轉來，再看到約櫃㧯安放个地方。
26若係佢無歡喜𠊎，恁樣，願佢照自家个好意款待𠊎。」
27王繼續對祭司撒督講：「你毋係先見嗎？你㧯亞比亞他做得帶你个孻仔亞希瑪斯㧯亞比亞他个孻仔約拿單共下安心轉城肚去。
28𠊎在曠野渡船頭該片等你等个消息。」
29所以撒督㧯亞比亞他將上帝个約櫃扛轉耶路撒冷，佢等就留在該位。
30大衛噭等上橄欖山；佢打赤腳，悲傷到揞等頭那。所有跈佢个人也全部揞等頭那，緊行緊噭。
31有人向大衛報告，講亞希多弗㧯押沙龍共下造反。大衛就祈禱講：「上主啊，求你使亞希多弗个計謀全部戇掉去！」
32大衛到山頂、敬拜上帝个地方，佢个朋友亞基人戶篩扯爛衫，委泥沙在頭那頂，出來迎接佢。
33大衛對佢講：「你跈等𠊎，對𠊎一些仔好處乜無。
34你若係轉城肚去，對押沙龍講：『王啊，𠊎願意忠心服事你，像頭擺服事若爸共樣』，恁樣，你就會幫助𠊎破壞亞希多弗个計謀。
35兩個祭司撒督㧯亞比亞他敢毋會在該位嗎？你做得將你在王宮肚聽到个每一件事㧯佢等講。
36撒督个孻仔亞希瑪斯㧯亞比亞他个孻仔約拿單也㧯佢等共下。你就將打探到个消息交給佢等帶來給𠊎。」
37所以，大衛个朋友戶篩轉城肚去；堵好押沙龍也在該時到耶路撒冷。