1猶大王亞哈斯在位第十二年，以拉个孻仔何細亞做以色列王；佢在撒馬利亞統治九年。
2佢行上主看做邪惡个事，總係無像佢以前該兜以色列王恁壞。
3亞述皇帝撒縵以色來攻打佢；何細亞就投降，逐年向撒縵以色進貢。
4有一年，何細亞派人去見埃及王梭，想愛反亞述，無再繼續逐年向亞述皇帝進貢。亞述皇帝知這件事，就將何細亞捉起來，關在監獄肚。
5後來，亞述皇帝攻打以色列，包圍撒馬利亞。圍城个第三年，
6也就係何細亞在位第九年，亞述皇帝攻下撒馬利亞，將以色列人捉到亞述去，將佢等放在哈臘城、歌散區个哈博河附近、㧯米底亞人个城市。
7撒馬利亞陷落係因為以色列人得罪上主—佢等个上帝。上主識救佢等離開埃及王个管轄，𢱋佢等出埃及，佢等反轉去拜別个神明，
8學該地方人民个風俗，就係上主在佢子民面前逐走該兜外族人，又接受該兜以色列王所設个規矩。
9以色列人暗中行上主—佢等上帝看做邪惡个事。佢等在所有个城鎮，對守望台到防衛城起山岡頂个神廟，
10又在所有个山岡頂㧯大樹下，頓石柱㧯亞舍拉女神个柱像。
11佢等學上主所逐走該兜原來个外族人，在逐個神廟肚燒香。佢等邪惡个行為惹上主發譴；
12佢等拜偶像，就係上主不准佢等做个。
13上主識派佢个先知㧯先見去警告以色列㧯猶大講：「愛離開你等个壞行為，遵守𠊎个誡命，就係𠊎給你等祖先个法律㧯𠊎通過𠊎僕人—該兜先知傳給你等个法律。」
14總係佢等毋肯聽；佢等像佢等个祖先恁硬頸，毋信靠上主—佢等个上帝。
15佢等拒絕上主个教訓，毋守佢㧯佢等祖先所立个約，毋搭佢个勸誡。佢等去拜虛假个偶像，自家也變做虛假。佢等學四周圍外族人个風俗，毋聽從上主个命令。
16佢等離開上主—佢等个上帝所有个法律，鑄造兩隻金牛來拜，又造亞舍拉女神个柱像；佢等拜日月星辰，事奉巴力。
17佢等將自家个子女用火燒來獻給原來外族人个神明，又行邪術㧯卜卦。佢等出賣自家，行上主看做邪惡个事，惹佢發譴。
18所以上主向以色列人大發譴，對自家面前將佢等逐走，只賸到猶大國。
19總係，猶大人民也毋遵守上主—佢等上帝个誡命；佢等跈以色列人行對外族人學來个風俗。
20所以上主豁掉所有个以色列人，使佢等受苦，將佢等交在搶劫佢等个仇敵手中，最後對自家面前將佢等逐出去。
21上主使以色列對大衛家族分裂出來以後，以色列人設立尼八个孻仔耶羅波安做佢等个王。耶羅波安引誘佢等悖逆上主，害佢等陷落在大罪中。
22以色列人一直無離開耶羅波安所犯个罪，
23直到上主對自家面前逐出佢等，就像佢先前通過厥僕人—該兜先知所警告个。恁樣，以色列人對本地被人捉到亞述去，一直住在該位。
24亞述皇帝對巴比倫、古他、亞瓦、哈馬、㧯西法瓦音將人民徙到撒馬利亞逐城市，來代被人捉走个以色列人。亞述人就佔領撒馬利亞，住在當中這兜城市。
25正搬來住个時，佢等毋敬拜上主，上主就派獅仔咬死佢等當中个一兜人。
26有人㧯亞述皇帝講，該兜徙到撒馬利亞个亞述人毋知該地神明个規矩，所以神明派獅仔咬死佢等。
27亞述皇帝就下令講：「對捉來个祭司當中派一個轉去，愛佢住在該位，教人民學該地方神明个規矩。」
28所以有一個對撒馬利亞被人捉去个祭司轉去，住在伯特利，教人民樣般敬拜上主。
29總係徙到撒馬利亞个各族人在所住个城肚繼續製造自家个偶像，將偶像放在撒馬利亞人起个神廟肚。
30巴比倫人製造疏割‧比訥个神像；古他人製造匿甲个神像；哈馬人製造亞示瑪个神像；
31亞瓦人製造匿哈㧯他珥他个神像；西法瓦音人將佢等个子女用火燒來獻給佢等个神明亞得米勒㧯亞拿米勒。
32這兜人同時也敬畏上主，各種人選出自家个人來做祭司，在山岡頂个神廟代佢等獻祭。
33佢等敬畏上主，總係也照佢等原來國家个風俗拜自家个神明。
34佢等到今晡日還係保持舊个風俗；佢等毋係正經敬畏上主，也無遵守上主給雅各後代个法律誡命。(上主識將雅各又安名做以色列。)
35上主識㧯佢等立過約，吩咐佢等講：「做毋得拜別个神明，做毋得跪拜佢等，做毋得事奉佢等，也做毋得獻祭給佢等。
36你等愛敬畏𠊎—上主；𠊎識用大能大力帶你等出埃及。你等愛跪拜𠊎，獻祭給𠊎。
37你等愛永遠遵從𠊎寫給你等个法律誡命。你等做毋得敬拜別个神明。
38𠊎㧯你等所立个約，你等做毋得毋記得。你等做毋得敬拜別个神明。
39你等愛單單敬畏𠊎—上主、你等个上帝，𠊎就救你等離開仇敵个手。」
40總係該兜人毋肯聽，繼續照佢等自家个舊風俗行。
41該兜人民敬拜上主，又服事佢等个偶像；直到今晡日，佢等个後代還係學佢等个祖先恁樣行。