1利瑪利个孻仔比加做以色列王第十七年，約坦个孻仔亞哈斯做猶大王。
2該時亞哈斯二十歲；佢在耶路撒冷統治十六年。佢無學厥祖先大衛王行上主—佢个上帝看做著个事；
3佢反轉學以色列列王个壞模樣，甚至將自家个孻仔用火燒來獻給偶像，學原來外族人个邪惡行為；該兜人民就係以色列人入去這地該時上主逐出去个人。
4亞哈斯在神廟內、山岡頂㧯逐頭大樹下獻祭燒香。
5敘利亞王利汛㧯以色列王利瑪利个孻仔比加攻打耶路撒冷，圍困亞哈斯，總係無法度打贏佢。
6(這時，敘利亞王利汛收復以拉他城，將住在該位个猶大人逐出去。以東人來定居在以拉他，一直住在該位。)
7亞哈斯派使者去見亞述皇帝提革拉‧比列色，講：「𠊎係你个僕人、係歸屬你个；敘利亞王㧯以色列王當在這位攻打𠊎，求你來救𠊎！」
8亞哈斯將上主个聖殿㧯王宮寶庫肚所有个金銀做禮物，送給亞述皇帝。
9亞述皇帝答應亞哈斯个請求，就帶領軍隊去攻打大馬士革，佔領該城，將利汛王㓾掉，又將人民捉到吉珥。
10亞哈斯王到大馬士革迎接亞述皇帝提革拉‧比列色个時，看到該位个祭壇，就將詳細个起法㧯圖樣送到祭司烏利亞該位。
11所以烏利亞照該圖樣起一座祭壇，在亞哈斯王還吂轉來以前就完工了。
12王對大馬士革轉來，看到祭壇，就行前去，
13在該頂高獻燒化祭㧯素祭，又祭酒又洒平安祭个血。
14獻祭給上主个銅祭壇本來在新壇㧯聖殿中間，亞哈斯王將它徙到新壇个北片，
15然後命令祭司烏利亞講：「用𠊎這座大祭壇獻朝晨个燒化祭㧯臨暗仔个素祭，王个燒化祭㧯素祭，人民个燒化祭、素祭㧯祭酒，並將所有牲儀个血洒在頂高。總係𠊎愛留銅祭壇來卜卦。」
16祭司烏利亞就照亞哈斯王个命令去做。
17亞哈斯王拆掉銅盆座四周圍个框架，將頂高个銅盆拿下來，又將十二隻銅牛背頂个銅海搬到石頭做个基座頂。
18亞哈斯為到愛巴結亞述皇帝，就將放王座位个檯仔徙出聖殿，又將王對外背愛入聖殿个走廊拆掉。
19亞哈斯其他个事全部記在《猶大列王史》底背。
20亞哈斯死掉，葬在大衛城个王室墳墓肚；佢个孻仔希西家承接佢做王。