1亞哈謝王个阿姆亞她利雅一聽講厥孻仔被人㓾死，就下令將猶大王个全家族㓾死。
2亞哈謝个孻仔約阿施險險㧯別個王子共樣也被太后㓾死，總係厥姑約示芭將佢偷救出來；約示芭係約何蘭王个妹仔、亞哈謝共爺無共𡟓个老妹。姖將約阿施㧯佢个乳𡟓囥在聖殿肚个間房，閃避亞她利雅，所以約阿施無被太后㓾死。
3亞她利雅太后統治猶大个期間，約阿施㧯乳𡟓在上主个聖殿肚囥六年。
4到第七年，祭司耶何耶大在上主个聖殿召見負責王室警衛㧯保護王宮該兜軍官，㧯佢等立約；佢喊佢等在上主个聖殿發誓，同意佢个計劃。然後佢就將王子約阿施帶到佢等面前，
5並命令佢等講：「安息日，你等當班个，三分之一个人愛看守王宮，
6三分之一个人愛看守蘇珥門，三分之一个人愛看守衛兵營个後門，大家愛照輪班看守王宮。
7在安息日無當班个兩隊人愛在上主个聖殿看守，保護王。
8你等逐儕愛拿等武器圍等來保護約阿施王；佢行到㖠位，你等就跈到㖠位；若係有人硬撞入來，就愛將佢㓾掉。」
9該兜軍官照祭司耶何耶大个指示將佢等个軍隊，無論在安息日當班抑係無當班个，全部帶來見祭司耶何耶大。
10耶何耶大將以前放在聖殿肚大衛王該兜槍㧯盾牌交給軍官。
11衛兵拿等武器企在聖殿頭前，對南片到北片，在祭壇㧯聖殿該位，愛在王子四周圍保護佢。
12然後，耶何耶大帶王子約阿施出來，將王冠戴在佢頭那頂，將一本有關王權條款个法律書交給佢，膏油設立佢做王。民眾拍手大聲喊：「願王萬歲！」
13亞她利雅聽到守衛㧯民眾歡喜盡嘶个聲，遽遽到群眾聚集个聖殿去。
14姖看到新王照儀式企在聖殿入口个柱仔堘頭，該兜軍官㧯喇叭手圍等佢，民眾全部歡喜到大聲喊，盡歕喇叭。亞她利雅扯爛衫，喊講：「造反了！造反了！」
15祭司耶何耶大無愛亞她利雅在上主个聖殿該位被人㓾死，吩咐該兜軍官講：「將姖對守衛當中帶出去；敢救姖个，共樣愛俾佢死。」
16所以佢等捉等亞她利雅，將姖帶到王宮，在馬門該所在將姖㓾掉。
17祭司耶何耶大設法俾約阿施王、人民㧯上主立約，愛做上主个子民。佢也喊王㧯人民立約。
18所以，全國人民到巴力廟去，拆掉廟，敲掉祭壇㧯偶像，又在祭壇頭前㓾掉巴力个祭司馬坦。耶何耶大派人看守上主个聖殿，
19然後，佢㧯軍官、王室侍衛、王宮守衛，護送王對聖殿到王宮；民眾全部跈在後背。約阿施對衛兵營个門入去，坐在寶座頂高。
20全國人民歡喜快樂，城肚也當平靜，因為該時亞她利雅已經在王宮被人㓾死。
21約阿施做猶大王个時正七歲。