1亞哈王有七十個子孫住在撒馬利亞。耶戶寫信仔給城肚个領袖、長老、㧯亞哈子孫个監護人，恁樣講：
2「你等係監護王後代个人；你等有自家个戰車、馬仔、武器、㧯堅固个城。
3所以，你等接到這信仔以後，就愛在王个後代中選出一個能力最強个人來，設立佢做王，好為你等主人个家相㓾。」
4撒馬利亞該兜領袖全部嚇到會死；佢等講：「連約蘭王㧯亞哈謝王也無法度對抗耶戶！𠊎等樣做得對抗佢呢？」
5所以王宮个總管㧯市長，連長老㧯該兜監護人，共下寫信仔送給耶戶講：「𠊎等係你个僕人，你吩咐𠊎等做个事，𠊎等全部會照做；總係𠊎等無愛設立麼人做王。請你吩咐𠊎等愛樣般做！」
6耶戶又寫一封信仔給佢等，講：「若係你等歸順𠊎，願意聽𠊎个命令，天光日這時，愛將亞哈王該兜子孫个頭那全部帶到耶斯列給𠊎。」亞哈七十個子孫係被撒馬利亞尊貴个人養育。
7當耶戶个信到个時，這兜尊貴个人將亞哈七十個子孫全部㓾掉，又將佢等个頭那裝在籃肚，送到耶斯列給耶戶。
8有使者㧯耶戶講，亞哈王該兜子孫个頭那已經帶來了。佢就命令人將該兜人个頭那堆在城門口，堆做兩堆，留到第二日。
9第二日打早，耶戶到城門口去，對該位个民眾講：「係𠊎反約蘭王，將佢㓾掉；總係這兜人係麼人㓾个呢？
10這證明上主所講有關亞哈後代个逐句話全部愛成就。上主已經實現佢通過佢个僕人先知以利亞所講个預言。」
11所以耶戶將亞哈該兜住在耶斯列个親屬、官員、親密个朋友、㧯祭司，全部㓾淨淨，一個也無留。
12耶戶離開耶斯列到撒馬利亞去。在路上一個牧人剪羊毛个地方，
13佢堵到猶大王亞哈謝个幾個親族，就問佢等：「你等係麼人？」佢等講：「𠊎等係亞哈謝个親族，愛到耶斯列去，向耶洗碧太后該兜王子㧯王其他个親族問安。」
14耶戶吩咐：「將佢等生生捉起來！」佢个部下就將佢等捉起來，在剪羊毛場个井堘將佢等㓾掉，一共四十二儕，一個也無留。
15耶戶對該位向前行，在路上堵到利甲个孻仔約拿達來迎接佢，就向佢問安講：「你對𠊎个誠意㧯𠊎對你个誠意共樣麼？」約拿達講：「共樣！」耶戶應講：「恁樣，手伸出來。」然後耶戶拉佢上戰車，
16講：「跈𠊎來，看𠊎樣般熱心為上主辦事。」佢等共下坐車到撒馬利亞。
17到該位，耶戶將亞哈其他个親族全部㓾掉，一個也無留，像上主通過以利亞所講个預言。
18耶戶召集所有个人民，對佢等講：「亞哈對巴力神明个事奉還毋罅，𠊎—耶戶愛還較熱心來事奉佢。
19你等去召集巴力所有个先知、所有拜巴力个人、㧯祭司來，毋好漏掉一個。𠊎愛向巴力獻大祭，無來个的確會無命，就愛處死。」這係耶戶个計謀；因為佢愛㓾掉所有拜巴力个人。
20所以耶戶下令講：「愛宣佈召開大會來拜巴力！」就發出通告。
21耶戶派人傳話到以色列逐所在。所有拜巴力个人全部來了，一個也無少。佢等入去巴力个廟，對頭前到後背全部尖到拶拶。
22耶戶吩咐管禮服个祭司將禮服帶出來給所有拜巴力个人著，佢就照命令去做。
23然後，耶戶㧯利甲个孻仔約拿達也入巴力个廟肚去，對該位个民眾講：「你等愛確實調查清楚，拜巴力个人正做得在場；敬拜上主个人做毋得入來。」
24所以耶戶㧯約拿達入去獻牲祭㧯燒化祭。耶戶已經派八十個人掌在廟个外背，吩咐佢等：「你等愛將這兜人全部㓾淨淨；若係俾一儕走掉，一定愛拿自家个命來賠！」
25耶戶獻祭煞，對該兜守衛㧯官長講：「到底背去，將佢等全部㓾掉！不准一個逃走！」佢等就入去，用刀仔㓾掉所有个人，將屍體拖出去。然後，佢等到巴力廟肚个內殿，
26將巴力廟肚个柱像搬出來燒掉；
27佢等破壞巴力个柱像，拆掉巴力个廟，將廟拿來做便所，直到今晡日。
28恁樣，耶戶對以色列當中除掉拜巴力个事。
29總係耶戶無離開尼八个孻仔耶羅波安所犯个罪，就係害以色列人在伯特利㧯但拜金牛。
30上主對耶戶講：「因為你對亞哈个子孫所做个事盡著，合𠊎心意，所以你个後代會承接你做以色列个王，到第四代。」
31總係耶戶無全心遵守上主—以色列上帝个法律。佢還係毋離開耶羅波安个罪，繼續害以色列人犯罪。
32該時，上主縮細以色列个土地。敘利亞王哈薛攻擊以色列全地，
33佔領約旦河東片所有个土地，南片直到亞嫩河滣个亞羅珥城，包含基列㧯巴珊个土地，就係迦得、呂便、東瑪拿西支族所住个地方。
34耶戶其他个事，㧯佢英勇个所做，全部記在《以色列列王史》底背。
35耶戶死後葬在撒馬利亞；佢个孻仔約哈斯承接佢做王。
36耶戶在撒馬利亞做以色列王二十八年。