1非利士人搶到上帝个約櫃以後，佢等對以便以謝將它扛到亞實突城。
2非利士人將上帝个約櫃扛入大袞神廟肚，放在大袞神像个堘頭。
3第二日打早，亞實突人䟘起來，看到大袞神像面向地泥，橫在上主約櫃頭前。佢等將它扶起來，放轉原來个所在。
4第三朝晨，佢等䟘起來又看到大袞神像面向地泥，橫在上主約櫃頭前。這擺，大袞个頭那㧯雙手全部拗斷掉，跌在門檻，只有賸到膚身。
5(所以，直到今晡日，大袞神个祭司㧯所有在亞實突个信徒全部𨃰過大袞神廟个門檻，毋敢踏上去。)
6上主重重責罰亞實突㧯四周圍地區个人民，使佢等全部發毒粒仔，驚到無葛無煞。
7佢等看到這情形，就講：「以色列个上帝重重責罰𠊎等㧯𠊎等个大袞神了。𠊎等做毋得繼續將約櫃留在這位。」
8所以，佢等派人去請非利士个五個領袖來，問佢等：「𠊎等應該樣般來處理以色列上帝个約櫃呢？」佢等應講：「將它徙到迦特去！」所以民眾就將以色列上帝个約櫃徙到該位。
9總係約櫃徙到該位以後，上主也責罰該城，引起當大个緊張。上帝使全城所有个人發毒粒仔，老个、後生个全部共樣。
10所以佢等將上帝个約櫃送到非利士另外一個城以革倫去。上帝个約櫃到該位个時，以革倫人全部盡喊講：「佢等將以色列上帝个約櫃扛來，愛將𠊎等全部害死！」
11所以，佢等派人去請非利士个五個領袖來，對佢等講：「將以色列上帝个約櫃送轉它原來个地方去！恁樣它正毋會害死𠊎等㧯𠊎等个人民。」因為上帝重重責罰佢等，全城个人被死驚到無葛無煞。
12該兜無死个人也滿身發毒粒仔。大家就盡喊，向佢等个神明求救命。