1掃羅㧯大衛講話結束以後，掃羅个孻仔約拿單个心黏等大衛个心。約拿單惜大衛，像惜自家个命一樣。
2對該日起，掃羅留大衛在身邊，毋俾佢轉屋下去。
3約拿單因為非常惜大衛，像惜自家个命一樣，就㧯大衛結拜做兄弟。
4約拿單脫下自家身上个外衫給大衛，又將自家个戰甲、刀仔、弓㧯腰帶全部給佢。
5掃羅無論派大衛去做麼介，佢攏總做到當順利，所以掃羅派佢做帶兵个官長。這件事使人民㧯掃羅个官員盡歡喜。
6大衛㓾死歌利亞以後，軍隊得勝轉來；以色列各城鎮个婦女全部出來迎接掃羅王。姖等當歡喜唱歌、跳舞、打鼓、彈琴。
7姖等緊跳、緊唱：「掃羅㓾死千千；大衛㓾死萬萬！」
8掃羅當惱這歌詞，氣勃勃講：「姖等給大衛萬萬，卻給𠊎千千，就賸到王位無給佢定定！」
9對該日起，掃羅就嫉妒大衛。
10第二日，有邪靈對上帝該位來，強烈控制掃羅，佢就像癲仔一樣在屋肚亂講話。大衛㧯平常共樣彈琴。掃羅拿等槍，
11自家㧯自家講：「𠊎愛將大衛刺在壁頂！」就對準大衛丟兩擺，總係兩擺被大衛閃開了。
12掃羅驚大衛，因為上主㧯大衛共下，卻離開掃羅。
13所以掃羅使大衛離開佢，派佢指揮一千人个軍隊。大衛帶領部下出入戰場，
14毋識打輸，因為上主㧯佢共下。
15掃羅看到大衛凡事成功，就還較驚佢。
16總係以色列㧯猶大个人民全部惜大衛，因為佢係一個盡優秀个領袖。
17掃羅對大衛講：「𠊎愛將𠊎大个妹仔米拉嫁給你，條件係你愛做一個勇敢个軍人，忠心服事𠊎，為上主相㓾。」(其實掃羅想借非利士人个刀仔㓾死大衛，毋使親身出手！)
18大衛應講：「𠊎係麼人？𠊎个家族在以色列算麼介？𠊎㖠堪得做王个婿郎？」
19到米拉應該㧯大衛結婚个時，掃羅反轉將姖嫁給米何拉人亞得列。
20總係，掃羅另外一個妹仔米甲愛到大衛。掃羅知這件事，就當歡喜，
21心肚想：「𠊎愛將米甲嫁給大衛，用姖做羅網，大衛就會死在非利士人手項。」所以掃羅第二擺對大衛講：「你愛做𠊎个婿郎！」
22掃羅又吩咐部下偷偷仔去對大衛講：「王當欣賞你，佢个官員也全部歡喜你。你這下去討王个妹仔係當好个時機。」
23掃羅个部下將這話㧯大衛講。大衛應講：「做王个婿郎係一件當光榮个事。像𠊎恁窮苦、卑微个人，敢堪得恁樣个光榮？」
24部下將大衛个話傳給掃羅，
25掃羅又命令佢等去㧯大衛講：「王所愛个聘禮係一百個非利士人个包皮，來做對仇敵个報復。」(這係掃羅个陰謀，想通過非利士人㓾大衛。)
26掃羅个部下將掃羅所講个話㧯大衛講，大衛當歡喜，願意做王个婿郎。在結婚以前，
27大衛㧯佢个部下去㓾死兩百個非利士人。大衛將佢等个包皮帶去交給掃羅，愛做王个婿郎。所以，掃羅無奈何就將妹仔米甲嫁給大衛。
28掃羅看出上主確實㧯大衛共下，佢个妹仔米甲也惜大衛，
29掃羅就還較驚大衛，一直㧯佢作對。
30非利士人个軍長常常來攻打；大衛出戰，逐擺个戰功比掃羅其他个官員贏加盡多，所以佢个名聲當受尊重。