1上主對撒母耳講：「你還愛為掃羅悲傷到幾時？𠊎已經豁掉佢，無愛佢做以色列个王。你愛將橄欖油裝滿角，帶到伯利恆人耶西該位，因為𠊎已經選佢一個孻仔做王。」
2撒母耳講：「𠊎樣做得恁樣做呢？若係掃羅知到，一定會㓾𠊎！」上主講：「你帶一隻細牛仔去，就講你係去該位向上主獻祭个。
3你愛請耶西來參加獻祭典禮；該時，𠊎會㧯你講愛樣般做。𠊎指示你麼人，你就膏油立佢做王。」
4撒母耳遵照上主个話去做。佢去到伯利恆，城肚該兜長老驚鹿鹿仔，問講：「你个訪問係帶平安來麼？」
5撒母耳應講：「𠊎會帶來平安。𠊎係來向上主獻祭个。你等愛洗淨自家，然後跈𠊎來。」撒母耳也喊耶西㧯佢該兜孻仔洗淨自家，前來參加祭禮。
6佢等到个時，撒母耳看到耶西个孻仔以利押，心肚想：「企在上主面前這儕人一定係佢愛膏油設立个。」
7總係上主對撒母耳講：「毋好看佢个外表抑係看佢恁高大。𠊎無選佢，因為𠊎看人無像世間人恁樣。人係看外表，上主係看內心。」
8然後，耶西喊厥孻仔亞比拿達對撒母耳面前行過去。總係撒母耳講：「上主乜無選這儕。」
9耶西又喊沙瑪對撒母耳面前行過去；撒母耳又講：「上主乜無選這儕。」
10恁樣，耶西喊佢七個孻仔全部經過撒母耳面前。撒母耳對佢講：「上主無選佢等當中个一儕。」
11所以撒母耳問耶西：「你還有其他个孻仔麼？」耶西講：「還有一個滿子；佢在野外掌羊。」撒母耳講：「喊佢到這位來。佢毋來，𠊎等就毋獻祭。」
12所以耶西派人去喊佢來。佢係一個面色紅潤、雙目有神、外表斯文个青年。上主對撒母耳講：「就係這儕！去㧯佢膏油！」
13撒母耳將橄欖油拿出來，在大衛該兜阿哥面前膏佢。上主个靈強烈臨到大衛，對該日起㧯佢共下。然後撒母耳就轉拉瑪去了。
14上主个靈離開掃羅；有邪靈對上主來蹧踏佢。
15掃羅个官員對佢講：「𠊎等知有邪靈對上帝來蹧踏你。
16所以請下令僕人去尋一個盡會彈琴个人來。邪靈對上帝來到你身上个時，該人一彈琴，你就會好。」
17掃羅就命令佢等：「去㧯𠊎尋一個盡會彈琴个人來！」
18掃羅一個部下應講：「伯利恆城个耶西有一個孻仔；佢盡會彈琴。佢係當勇敢个戰士，人盡斯文，又有口才；上主㧯佢共下。」
19所以，掃羅派使者到耶西該位，講：「喊你該掌羊个孻仔大衛到𠊎這位來。」
20耶西就用驢仔載餅仔、一皮袋个酒㧯一隻細山羊，交給厥孻仔大衛送給掃羅。
21大衛到掃羅該位，服事佢。掃羅當惜大衛，選佢做拿武器个侍衛。
22掃羅派人傳話給耶西：「𠊎當中意大衛；請俾佢留在這位服事𠊎！」
23對該時起，逐擺有邪靈對上帝來到掃羅身上个時，大衛就拿佢个琴來彈，邪靈黏時離開掃羅，掃羅就感覺盡爽快。