1在以法蓮山區个拉瑪城有一個人，名喊以利加拿。佢係耶羅罕个孻仔，以利戶个孫仔，係屬以法蓮支族，蘇弗宗族，託戶家族个人。
2以利加拿有兩個𡜵娘—哈娜㧯比尼娜。比尼娜有子女，哈娜就無。
3以利加拿逐年對拉瑪到示羅去敬拜上主—萬軍个元帥，向佢獻祭。在該位，有以利个兩個孻仔—何弗尼㧯非尼哈做上主个祭司。
4以利加拿逐擺獻祭後，一定將祭過个肉分給比尼娜一份，給姖个子女各一份。
5總係給哈娜个係特選个雙份，因為以利加拿當惜哈娜，雖然上主一直無俾姖𫱔。
6哈娜个對頭比尼娜常常侮辱姖，欺負姖，因為上主無給姖子女。
7這種情形年年共樣，逐擺佢等來到上主个殿，比尼娜就使哈娜艱苦到流目汁，食毋落東西。
8厥老公以利加拿會問姖：「哈娜！你做麼介噭？做麼介毋食東西？你樣般恁傷心？有𠊎敢毋係比有十個孻仔較贏？」
11哈娜許願講：「上主—萬軍个元帥啊，請看顧你使女个苦情，紀念𠊎，毋好毋記得𠊎！若係你賜給𠊎一個孻仔，𠊎一定會將佢一生人獻給你；佢个頭那毛一直毋剃掉。」
12哈娜一直向上主祈禱；以利緊看姖个嘴唇。
13因為哈娜心中恬恬祈禱，只有嘴唇挺動，無出聲，以利恅到姖食酒醉，
14就對姖講：「你愛醉到幾時？毋好再醉了！」
15哈娜應講：「大人啊，毋係恁樣！𠊎根本無啉酒；𠊎係心肚艱苦个婦女，當㧯上主講𠊎所有个苦情。
16毋好恅到你个使女係無規矩个婦人家；𠊎一直在這祈禱，因為𠊎實在盡傷心、盡痛苦。」
17以利講：「你做得平平安安轉去！願以色列个上帝照你所求个賜給你！」
18哈娜講：「願你常常用慈愛款待你个使女。」講煞，姖就離開，去食東西，面無再憂愁。
19第二朝晨，以利加拿全家人打早䟘起來敬拜上主，然後就轉拉瑪去。以利加拿㧯厥𡜵娘哈娜同房，上主聽哈娜个祈禱，
20姖就有身項，𫱔一個孻仔。哈娜㧯細人仔安名撒母耳，因為姖講：「這係𠊎向上主求來个。」
21去示羅个時間又到了，以利加拿帶厥屋下人上去向上主獻年祭，還佢所許个願。
22這擺哈娜無去；姖對老公講：「等細人仔斷乳，𠊎正帶佢去朝見上主，俾佢一生人留在該位。」
23以利加拿應講：「好！你認為恁樣做較好，就恁樣做；留在屋下等細人仔斷乳以後正去！總係，願上主實現佢自家个話！」所以哈娜留在屋下養育細人仔。
24細人仔斷乳以後，哈娜帶佢到示羅去，同時牽去一隻三歲个牛牯，十公斤麵粉，一皮袋酒。哈娜帶等還細个撒母耳去示羅，到上主个殿。
25㓾掉牛牯以後，佢等就將細人仔交給以利。
26哈娜對佢講：「大人啊，𠊎發誓，𠊎就係你以前看到、企在這位向上主祈禱該婦人家。
27𠊎向上主求這細人仔，佢照𠊎所求个賜給𠊎。
28所以𠊎愛將佢獻給上主；佢愛一生人歸屬上主。」佢就在該位敬拜上主。